مٿڀري سياست/ غيرروايتي سياست ويهين صديءَ جي پوئين اڌ ۾ سرد جنگ جي دوران سوويت يونين ۽ آمريڪا وچ ۾ روزبروز وڌندڙ ڇڪتاڻ ۽ ٻن طاقتور نيوڪليائي ٽيڪنالاجي رکندڙ ملڪن وچ ۾ جهيڙي سميت سيڪيورٽي ۽ دُنيا جي سالميت لاءِ تمام گهڻا خطرا کڻي آئي. اهڙن انتهائي سنگين مسئلن کي حل ڪرڻ لاءِ پاليسي جوڙيندڙ حلقن طرفان”هاءِ پالٽڪس“ جي اصطلاح کي استعمال ڪيو ويو. ڇاڪاڻ ته اهڙن مسئلن جي حل لاءِ روايتي سياسي سرگرمين بجاءِ غير روايتي طريقا استعمال ڪندي ”هاءِ پالٽڪس“ کي طاقتور مُلڪن جي پرڏيهي پاليسي ءَ ۽ سلامتي لاءِ ٺاهيل گهڻ رُخين پاليسين جو حصو بڻايو ويو. اهڙي طرح سوويت يونين ۽ آمريڪي معاملن کان سواءِ دُنيا ۾ وقت بوقت اُٿندڙ سنگين مسئلن کي مُنهن ڏيڻ لاءِ، هن قسم جي سياست جي ضرورت پوي ٿي. جيئن پاڪستان کي آمريڪا ۽ يورپ طرفان مذهبي شدت پسنديءَ خلاف شروع ڪيل جنگ (War on Terror) ۾ گهڻن تحفظات کان پوءِ به شريڪ ٿيڻو پيو ۽ هن جاکوڙ ۾ سڄي دنيا جو ساٿ ڏيڻ لاءِ پاڪستان کي پنهنجي وِت کان مٿانهين سياست High Politics جو حصو ٿيڻو پيو. ٻي عالمي جنگ کانپوءِ برطانيه جڏهن پنهنجي بيٺڪن کي آزادي ٿي ڏني، ته اُن ”هاءِ پاليٽڪس“ جي اصول تحت قائم ڪيل بيٺڪن جي ورهاست ۽ سندن خودمختياري عمل ۾ آندي. جنهن جو هڪ مثال ڀارت ۽ پاڪستان جي نئين سرحد بندي ڪرڻ به آهي. آمريڪا ۽ اولهه يورپ جڏهن ڪميونزم جي خاتمي لاءِ خطي ۾ ڀرپور ڪوششون ورتيون، ته انهن به سياست جي هن تصور کي ئي استعمال ڪيو. عام طرح سان ”هاءِ پاليٽڪس“ کي ڪنهن مسئلي جي مستقل حل لاءِ استعمال ڪيو ويندو آهي. ڪو ملڪ هن نظريي کي جڏهن فقط پنهنجن مفادن لاءِ استعمال ڪري ٿو، ته ان عمل سان انهيءَ ملڪ تي ٻين ملڪن جو اعتبار گهٽجي وڃي ٿو ۽ عالمي برادري ان جي هر تحرڪ کي شڪ جي نگاهه سان ڏسي ٿي. ڪيترين رياستن ۾ ملڪي سالميت يا يڪجهتيءَ جي لحاظ کان به ”هاءِ پاليٽڪس“ جي اصول جو استعمال ڪيو ويندو آهي. ڇاڪاڻ ته عوام لاءِ پرُ امن ماحول جي بحالي ۽ سندس سلامتيءَ کي برقرار رکڻ لاءِ مُلڪي سياست ۾ طئه ڪيل ترجيحن ۽ روين کي تمام باريڪ بينيءَ سان جاچيو ويندو آهي ۽ هر اهو رستو يا طريقو، جنهن ۾ ملڪ جي لاءِ ڪنهن قسم جا خطرا موجود هجن، انهيءَ کي ملڪي پاليسين جي جوڙجڪ کان ٻاهر رکي، پنهنجي پروگرام کي تبديل ڪيو ويندو آهي