Herpes genital

ھر.پيز ـ جَي.ناءِ.ٽي.لس

ھڪ جنسي وچڙندڙ بيماري (sexually transmitted infection) جنھن جو ڪارڻ ھرپيس سمپليڪس وائرس (herpes simplex virus) ايڇ ايس وي2 (HSV2) ٿئي ٿو. انڪيوبيشن پيرڊ اٽڪل ھڪ ھفتو ٿئي ٿو ان کانپوءِ جيڪي نشانيون پيدا ڪري ٿي انھن ۾ جنسي حصن تي سور، ساڙو، خارس ۽ ننڍڙا ڦلوڪڻا پيدا ڪري ٿي. واتوڻي سيڪس (oral sex) سبب وات ۾ ڦلوڪڻا پيدا ٿي سگهن ٿا جيڪي ڦاٽي ننڍڙيون پيڙاڪن السرون پيدا ڪن ٿا جيڪي 10 کان 21 ڏينھن ۾ ڇٽي وڃن ٿا. چڏن جا لمف نوڊ (lymph nodes) سڄي تڪليف ده ٿي پون ٿا ۽ متاثر فرد کي مٿي جو سور ۽ بخار ٿي سگهي ٿو. جڏھن ته ڪن متاثر فردن کي ظاھراً ڪي به نشانيون يا علامتون ظاھر نٿيون ٿين. جينائيٽيل ھرپيس جو علاج ڪونھي پر دوائن رستي تڪليفن جي شدت گهٽائي سگهجي ٿي. اينٽي وائرل دوائون (antiviral drugs) جھڙوڪ: ايسيڪلووير (aciclovir) سان السر گهٽ پيڙاڪن ٿي پوي ٿي ۽ ڇٽائڻ ۾ مددگار ٿي سگهي ٿي. اھڙا ٻيا اپاءَ انلجيسڪ دوائون (analgesic drugs) ۽ لوڻ جي ڳار واري پاڻيءَ سان وھنجڻ ٿئي ٿو.ھي وائرس جسم ۾ داخل ٿيڻ کانپوءِ متاثر فرد جي جسم ۾ سـڄي حياتي موجود رھي ٿو، وائرس جا خاص طور تي بار بار حملا ان عرصي دوران ٿي سگهن ٿا جڏھن متاثر فرد اگهو، پريشان يا اداس رھي ٿو يا ھم بستري ڪرڻ کانپوءِ. جنسي عمل رستي (واتوڻي سيڪس سميت) وائرس ٻين فردن ۾ وچڙي سگهي ٿو پوءِ ڀلي ته بيماريءَ جون نشانيون ظاھر نه به ٿيندڙ ھجن. وقت گذرڻ سان گڏ اٿلي پوندڙ حملا گهٽ ۽ گهٽ شدت وارا ٿين ٿا تنھنڪري حامله عورت مان بيماريءَ جي منتقل ٿيڻ واري خطري کي گهٽائڻ لاءِ اينٽي وائرل دوائون تجويز ڪري سگهجن ٿيون ته ابھم سيزيريئن سيڪشن (caesarean section) رستي ڄڻائي سگهجي ٿو.