"12 مارچ 1996ع ۾ آمريڪا جي سينيٽر ”جيسي هيلمس“ ۽عوامي نمائيندي ”ڊين برٽن“، ”ڪيوبا جي آزادي ۽ سهمتيءَ جي قاعدي“ (The Cuban Liberaty and Solidarity Act) نالي هڪ قانون متعارف ڪرايو. جيڪو ٻنهي قانون دانن ”هيمس-برٽن“ جي نالن پُٺيان مشهور ٿيو. هيءُ ايڪٽ دراصل فيبروري 1996ع ۾ ڪيوبا طرفان سندس علائقي مٿان اُڏامندڙ ٻن آمريڪي هوائي جهازن کي تباهه ڪرڻ جي سزا طور، ڪيوبا جي مٿان معاشي پابنديون Economic Embargo)) مڙهڻ جي حوالي سان آمريڪي قانون ساز ادارن مان پاس ڪرايو ويو. مبصرن جي خيال موجب ”هيلمس- برٽن“ ايڪٽ جي مسودي ۾ ٽي وڏيون خاميون ملن ٿيون.
1. هن ايڪٽ تحت اهو طئه ڪيو ويو ته ڪيوبا سان واپاري لاڳاپا رکندڙ مُلڪ کي برداشت نه ڪيو ويندو. ۽ اهڙي وهنوار رکندڙ مُلڪ خلاف آمريڪا طرفان سخت قدم کنيو ويندو. ياد رهي ته هن قسم جو ڪو به شرط بين الاقوامي قانون جي بلڪل خلاف آهي. اهڙي پڪ آمريڪي پرڏيهي پاليسيِءَ جي معمار صدر جيمس مونرو (1823ع) جي جوڙيل پرڏيهي پاليسيءَ جي جڳ مشهور نظريي (Monroe Doctrine) ۾ به ڏني وئي هئي. ان نظريي ۾ واضح طور تي سفارتي معيارن ۽ بين الاقوامي قانون جي پاسداريءَ تي زور ڏنل هيو. هيمس- برٽن ايڪٽ، آمريڪي پرڏيهي پاليسيءَ جي بُنيادي نُڪتن جي خلاف هيو. جيئن ته ان وقت جي ڏکڻ آفريقي حڪومت اهڙي بندش جي خلاف ڪيوبا سان واپاري لاڳاپا برقرار رکڻ ٿي چاهيا، تنهنڪري ڏکڻ آفريقا هن ايڪٽ جو بائيڪاٽ ڪيو. ان کان علاوه دُنيا جي ٻين ڪيترن ملڪن کي به انهيءَ ايڪٽ جي متن تي سخت اعتراض ۽ تحفظات هُئا.
2. آمريڪا طرفان ”نئين عالمي نظام“ جي تعارف دوران پنهنجن سياسي مُخالفن ۽ ساڻس نظرياتي اختلاف رکندڙ مُلڪن سان واپاري تعلقات وڌائڻ ۽ عالمي امن جي واڌ ويجهه جي ڳالهه ڪئي وئي هُئي، پر 1996ع ۾ انهيءَ پاليسيءَ جي اُبتڙ جوڙيل ”هيمس - برٽن ايڪٽ“ جوڙي آمريڪا پاران، هڪ ڀيرو ٻيهر ”ٿڌي جنگ“ وارن لاِڙن کي هٿي ڏني. آمريڪا انهيءَ ايڪٽ پاس ڪرڻ کان اڳ، پنهنجي پرڏيهيءَ پاليسيءَ جو جيڪو خاڪو ۽ ترجيحون پيش ڪيون هُيون، اُهي ايڪٽ جي بنيادي نُڪتن جي بلڪل اُبتڙ هُيون.
3. ڪيوبائي صدر فيڊريل ڪاسترو جي مخُالف ”جمهوريت پسندن“ جي حمايت ذريعي هڪ طرف پنهنجي مُلڪ ۾ جمهوريت جا مضبوط بنياد وجهڻ لاءِ ڪوششون وٺي رهيو هيو، ته ٻئي طرف معاشي پابنديون هڻي ڪيوبا جي عوام سميت دُنيا ۾ انصاف پسندن جي نظر ۾ پاڻ کي بدنام ڪري رهيو هو. آمريڪا، ڪيوبا تي 1960ع کان مختلف پابنديون مڙهي رهيو هو، جنهن ڪري هڪ طرف ڪيوبا ۽ آمريڪا جي وچ ۾ ڇڪتاڻ جاري رهي، ته ٻئي طرف علائقي ۾ آمريڪي بالادستيءَ خلاف پڻ ماحول جُڙندو رهيو"