Heatstroke

ھيٽ ـ اسٽروڪ

سج لڳڻ، ڏينھن لڳڻ، ھڪ اھڙي موتمار حالت ٿئي ٿي جيڪا گرميءَ ۾ حد کان وڌيڪ وائکي ٿيڻ سبب پيدا ٿئي ٿي ته ان سان گڏ جسم جو گرمي ھلائيندڙ طريقيڪار به ڊانواڊول ٿي جسم کي خطرناڪ حد تائين گرم ڪري ڇڏي ٿو. گرمي لڳڻ جو ھڪ عام ڪارڻ گرم آبھوا ۾ ڊگهي عرصي تائين وائکو ٿيڻ ٿئي ٿو. سخت ڪم، نامناسب پوشاڪ، حد کان وڌيڪ کائڻ، تمام گهڻو الڪوحل واپرائڻ ورلي ان جا ڪارڻ ٿي سگهن ٿا. گرمي لڳڻ کانپوءِ عام طور تي گرميءَ جي ساڻائي (heat exhaustion) ٿي پوي ٿي جنھن سبب ساڻائي ۽ شديد پگهرجڻ ٿئي ٿو. گرمي لڳڻ سان گڏ پگهرجڻ گهٽجي بلڪل بند به ٿي سگهي ٿو. چمڙي گرم ۽ خشڪ، ساه کڻڻ جو عمل تراکڙو، نبض تيز ۽ ھيڻي ٿي وڃي ٿي. جسم جو گرمي پد ڊرامائي انداز ۾ وڌي وڃي ٿو ۽ علاج نه ڪرڻ سان ممڪن ٿئي ٿو ته مريض ھوش وڃائي مري سگهي ٿو. گرميءَ کان بچڻ لاءِ پاڻکي آھستي آھستي گرم ماحول سان ھيرائڻو پوي ٿو (ڏسو، heat disorders). جيڪڏھن گرمي لڳي پوي ته ترت علاج لاءِ اسپتال ڀيڙو ٿيڻو پوي ٿو.