جديد عالمي سياست جي هن نظريي کي سڀ کان اڳ ناميارن سماجي سائنسدانن مان هڪ ’مارٽن وائٽ‘ هڪ اصطلاح طور کي منظرعام تي آندو ۽ ’هيڊلي بُل‘ اڳتي وڌايون، جڏهن ته عالمي قانون جي ابي Hugo Grotius 1609ع ۾، ”آزاد سمنڊ“Mare Liberum ۽ 1625ع ۾ ”جنگ ۽ امن جي قانون بابت“ (De Jure Belli ac Pacis) جي عنوان سان مضمون لکيا. نامياري سياسي دانش ور هيڊلي بُل مطابق، پهرين مهاڀاري لڙائيءَ کان پوءِ جيڪي بين الاقوامي قانون ۽ ضابطا مقرر ڪيا ويا، اهي سڀ گروشس جي ٻڌايل تصور ”انٽرنيشنل سوسائٽي“ جهڙا آهن. هُوگو گروشس به پنهنجي مضمونن ۾ بين الاقوامي قانون جي لاڳو ٿيڻ کي لازم قرار ڏيئي ٿو ۽ انهيءَ ۾ ئي ملڪن جي ڀلائي ڏسي ٿو. هيڊلي بُل گڏيل قومن جي جوڙجڪ کي گروشس جي نظريي سان جوڙي ٿو. ماهرن جو خيال آهي ته گروشس جنهن وقت هي نظريو سامهون آندو، ان وقت مُختلف ملڪن وچ ۾ ويجهڙائيون پيدا ڪرڻ ۽ ”گلوبل ورلڊ“ جو ڪو خواب ۽ خيال به نه هيو. ڪُجهه حلقن جو خيال آهي ته تيزيءَ سان تبديل ٿيندڙ اڄوڪي دُنيا ۾ گروشس جا ”گڏيل سيڪيورٽي“ ۽ ”گڏيل سماجي ۽ معاشي سرگرميون“ وارا تصور عمل ۾ آڻڻ ناممڪن آهن، پر هيڊلي بُل جو خيال آهي ته گروشس جي ”بين الاقوامي سماج“ واري نظريي کي نئين صديءَ ۾ به ختم نه ٿو ڪري سگهجي ۽ اهو ڪنهن نه ڪنهن حوالي سان اڄ به لاڳاپيل نظر اچي ٿو