حڪمراني، اختياري

حڪمراني- حڪومت

حڪمراني (Governance) جيتوڻيڪ حڪومت جي تصور سان جڙيل آهي، ان هوندي به اهو حڪومتي اختيار هيٺ ڪنهن خاص قانوني نظام ڏانهن اشارو ڪري ٿو. حڪومت مان مطلب اهڙي سرگرمي آهي ،جيڪا با اختيار فرد/ جماعت طرفان آئيني ۽ قانوني تقاضائن مطابق سرانجام ڏني وڃي . جڏهن ته حڪمراني وڌيڪ وسيع لفظ آهي . اهو اصطلاح رياستي ڪار وهنوار ۾ حڪومتي ادارن طرفان ٿيندڙ فيصلن، عوامي اميدن جي پورائي ۽ حڪومتي ڪارڪردگيءَ سان لاڳاپيل ۽ سماج جو رسمي توڙي غير رسمي ڪاروهنوار هلائيندڙ مختلف عنصرن تي ٻڌل هوندو آهي . جيڪي رياست ۾ استحڪام کي قائم رکڻ ۽ هاڪاري تبديليءَ/ترقيءَ لاءِ ماحول مهيا ڪن ٿا . بين الاقوامي تعلقات ۾ هي اصطلاح ادارن جي جوڙجڪ ۽ حڪومتي نظام (Regime) لاءِ گڏيل طور استعمال ٿيندو آهي . اڄڪلهه جي استعمال مطابق ، لفظ ’حڪمراني‘ سان گڏ عام ڪري صفت ”سٺي“ (Good) جو اظافو ڪيو ويندو آهي . اهو تصور جمهوريت جي ڦهلاء َ، ادارتي استحڪام ۽ آزاد منڊيءَ سان جڙيل آهي. خاص طور عالمي بئنڪ ۽’آئي ايم ايف‘ جي اڀياس موجب ، دنيا ۾ جيڪي به حڪومتون ڪرپشن، اقربا پروري، آمريت ۽ انتهاپسنديءَ جو شڪار آهن، سي حڪمرانيءَ جي بهتر ماڊل طور پيش نه ٿيون ڪري سگهجن