جنرل اسيمبلي- عام مجلس

هي گڏيل قومن جي ڇهن مکيه جُزن(Organs) مان اهم ترين جُز آهي. اداري جا مڙئي رڪن مُلڪ هن جزي جا رڪن هوندا آهن. اداري جي پڌرنامي يا ميثاق جي دائري ۾ رهندي، اهو جز دُنيا جي ڪنهن به مسئلي ۽ موضوع تي بحث ڪري سگهي ٿو. بهرحال ان اداري جون سفارشون ڪنهن به رڪن ملڪ تي مڃڻ جي پابندي نه آهي. جنرل اسيمبليءَ جي اجلاسن ۾ گڏيل قومن جي اداري سان واڳيل مالي ۽ سياسي معاملن تي بحث ڪرڻ سان گڏ، بُنيادي پاليسيون جوڙڻ، نون ملڪن طرفان مليل درخواستن تحت کين ميمبر بنائڻ/ رد ڪرڻ ۽ سالياني بجيٽ جي منظوري 2/3 جي اڪثريت سان ڏيڻ شامل آهي. اهو جز سلامتي ڪائونسل جا ”غير مستقل رڪن“ ۽ گڏيل قومن جي ٻين ماتحت ادارن جا رڪن چونڊي ٿو. عام طرح هن اداري جو هر سال سيپٽمبر کان ڊسمبر جي مهينن تائين، اداري جي صدر يا سيڪريٽري جنرل جي مهنداريءَ ۾ هڪ ڀيرو جنرل اجلاس ڪوٺايو ويندو آهي. انهن ٻنهي عهديدارن جي چونڊ ووٽ ذريعي ٿيندي آهي. عام طور تي صدر ڪنهن غريب مُلڪ مان چونڊيو ويندو آهي، جڏهن ته سيڪريٽري جنرل جي چونڊ ۾ تمام گهڻي ورڪ ڪرڻي پوندي آهي. هن اداري کي گڏيل قومن جي ڪم جي نگراني، نظرثاني ۽ جائزي جا اختيار ڏنل آهن. اداري جو وهنوار هلائڻ لاءِ 17 نائب صدر ۽ اسٽينڊنگ ڪميٽين جا 17 چيئرمن چونڊيا ويندا آهن. اهي سڀ عهديدار صدر سان گڏجي ”جنرل ڪميٽيون“ جوڙيندا آهن، جيڪي اسٽيئرنگ ڪميٽي جوڙي، پنهنجون تجويزون صدر کي پيش ڪندا آهن. اهي ڪميٽيون ۽ عُهديدار دُنيا جي مُختلف خطن جي نمائندگيءَ جي بُنياد تي رکيا ويندا آهن. جنرل اسيمبليءَ جون هيٺيون 6 مُک ڪاميٽيون آهن.
(1) هٿيارن جي ڊوڙ گهٽائڻ ۽ عالمي تحفظ جي ڪميٽي.
(2) معاشي معاملن بابت ڪميٽي. (3) سماجي ۽ انساني ڀلائيءَ ۽ ثقافتي معاملن جي ڪميٽي.
(4) نو آبادياتي نظام جي خاتمي بابت ڪميٽي.
(5) انتظامي ۽ بجيٽ جي معاملن جي ڪميٽي.
(6) قانوني معاملن بابت ڪميٽي. جنرل اسيمبلي گڏيل قومن جي پڌرنامي ۾ درج ڪنهن به معاملي تي بحث ڪري سگهي ٿي، خاص ڪري بين الاقوامي سلامتيءَ جي معاملن تي اها مسلسل غور ڪندي رهي ٿي. بين الاقوامي تعاون وڌائڻ لاءِ سفارشات مرتب ڪرڻ به هن ئي فورم جي ذميواري آهي . گڏيل قومن جي اطلاع موجب هن وقت دُنيا جا 193 مُلڪ هن اداري جا ميمبر آهن، جن کي انفرادي طرح برابريءَ جي بُنياد تي هڪ ووٽ جو حق حاصل آهي. اداري جو پهريون اجلاس 10 جنوري 1946ع تي لنڊن ۾ ٿيو، جنهن ۾ دنيا جا 51 ملڪ شريڪ ٿيا