هي حقيقت پسند، نظريي جو هڪ قسم آهي جيڪو عالمي سياست ۾ هڪ رياست جي رويي بابت بحث ڪري ٿو. پرڏيهي پاليسيءَ جو هيءُ اصطلاح فيصلي سازيءَ جي عمل ۾ ٻن ڌرين جي وچ ۾ ٿيندڙ چٽا ڀيٽيءَ دوران فضيلت يا عقلمنديءَ جي تقاضائن کي واضح ڪري ٿو، بين الاقوامي تعلقات ۾ ٻه رياستون/ ڌريون هميشه فائدا وڌائڻ ۽ نقصان گهٽائڻ واري نيتيءَ تي عمل ڪندي اڻ پوري معلومات ۽ بي يقينيءَ واري صورتحال ۾ هر ڌر کي صلاحيتون وڌائڻ، امڪانن کي درست طريقي سان ماپڻ ۽ مقابلي ۾ آيل ڌر جي چالن کي ناڪاره بنائڻ تي زور ڏئي ٿي. ٻن ڌرين ۾ ٿيندڙ مقابلي دوران هڪ ڌر کي حاصل ٿيندڙ ڪاميابيون ٻيءَ ڌر کي مليل اوترين ناڪامين جي بنياد تي ملن ٿيون ته ان کي ”پاڇي ٻڙيءَ راند“ (Zero Sum Game) واري اصطلاح سان نروار ڪيو وڃي ٿو. جڏهن ته ”ڦرندڙ حسابي راند“ ( Variable Sum Game) واري قسم مطابق ضروري ناهي ته ڪابه ڌر نقصان ڪري، بلڪ ٻنهي ڌرين کي فائدي جا امڪان آهن، اهڙي صورتحال کي ”هاڪاري راند“ ( Positive Sum Game) طور به سڏيو ويندو آهي. ان جي ابتڙ چٽا ڀيٽيءَ جي ٻئي قسم ۾ ٻئي ڌريون نقصان کائي سگهن ٿيون. ان کان سواءِ Persons Game Numerous واري اصطلاح ۾ هڪ کان وڌيڪ ڌريون حصو وٺي سگهنديون آهن، هن نظريي عام طور تي هٿيار سازي ۽ سگهه جي برابري (Deterrence ) وارن رخن ۾ اڳڀرائي ڪئي آهي، پر ان کان علاوه انتشاري صورت ۾ ٻن رياستن وچ ۾ تعاون وڌائڻ جي حوالي سان به هن نظريي جو استعمال نظر آيو آهي، البت هن نظريي جو بنيادي محور ڪنهن به رياست طرفان ٻين رياستن جي تعاون بجاءِ اڪيلي سر ڪنهن به مهم/حاصلات لاءِ ڪيل اڳڀرائيءَ جي چوڌاري ڦري ٿو، انهيءَ ڪري هن موضوع بابت ڳالهائيندي ”بين الاقوامي طاقتن“، ”علائقائي تعاون“ ۽ ”تڪرار جي حل“ جهڙن مامرن تي به ٽيڪاٽپڻي ڪئي وڃي ٿي، هن نظريي کي ناميارن عالمن ۽ محققن ”نيومن ۽ مارگينسترن“ ( Neuman and Oskar Morgenstern) پنهنجي ڪتاب The Theory of Games and Economic Behavior ۾ پهريون دفعو چٽائيءَ سان پيش ڪيو