Eating disorders

ايٽنگ ـ ڊس.ئارڊر

نفسيات جي لحاظ کان کاڌي جي ابترين ۾ چار قسم شامل ٿين ٿا: اينوريڪسيا نرووسا (anorexia nervosa)، بُليميا (bulimia)، ريومينيشن ڊسئارڊر (rumination disorder) ۽ پڪا (pica). انوريڪسيا نرووسا ۾ بک ڪاٽي وڃي ٿي. ڇاڪاڻ ته، اھڙن فردن جو ويساه ٿئي ٿو ته سندن وزن گهڻو آھي پوءِ ڀلي ته بدغذائيت سبب سندن جسم کل جھڙا ڇو نه لڳندا ھجن. بُليميا ۾ حد کان وڌيڪ کائجي ٿو ۽ پوءِ الٽي ڪري ڪڍي ڇڏجي ٿو يا جلاب ۽ پيشاب ڪرائيندڙ دوائون استعمال ڪجن ٿيون ته جيئن وزن وڌي نه سگهي. انوريڪسا جا ڪيترا مريض بک ڪاٽڻ سان گڏ بُليمي طريقا به استعمال ڪن ٿا. عام طور تي اھڙيون ابتريون عورتن خاص طور تي نوجوان ڇوڪرين کي متاثر ڪن ٿيون بنسبت مردن جي جن ۾ تمام گهٽ ٿين ٿيون، ڪيترن محققن جو خيال آھي ته انوريڪسيا ۽ بليوما جو ڪارڻ دماغ ۾ ڪيميائي اڻبرابري ٿئي ٿي. ٻين جو وساه آھي ته ان جو ڪارڻ سماجي رويا ٿين ٿا جتي سنھڙائپ کي قدر جي نگاه سان ڏسجي ٿو. عام طور تي ريومينيشن، ٻالڪپڻي ۾ شروع ٿئي ٿي جنھن ۾ بار بار اوڳاڇڻ سان گڏ وزن گهٽائڻو پوي ٿو. جيڪي ابھم اوڳاڇڻ ۾ مبتلا ٿين ٿا اھي اوڳاڇيل کاڌو وري ڳھي وڃن ٿا. پڪا به عام طور تي ابھمن ۾ ٿئي ٿي جيڪي ڪيتريون مختلف غيرغذائي شيون جھڙوڪ: پلستر، رنگ يا پن کائيندا رھن ٿا. عام طور تي ٿلهائپ کي کاڌي جي ابتري نٿو سمجهيو وڃي ڇاڪاڻ ته ان جا ڪارڻ فزيالاجيڪل ٿين ٿا.