دنيا جي گولي کي ماحولياتي گدلاڻ کان بچائڻ لاءِ گڏيل قومن جي سهڪار سان ڏکڻ آمريڪا جي ملڪ برازيل جي گاديءَ واري شهر’ ريو ڊي جينيرو‘ ۾ 3 جون کان 14 جون 1992ع تائين هڪ عالمي سرواڻ ڪانفرنس ٿي. ان ڪانفرنس ۾ 172 ملڪن جي حڪومتن شرڪت ڪئي، جن مان 108 ملڪن جا حڪومتي سرواڻ به شامل هُئا. ان کان سواءِ ڪانفرنس ۾ 2400 غير سرڪاري تنظيمن ۽ مُختلف قسمن جي ڪُل 17 هزار نمائندن به شرڪت ڪئي. ان موقعي تي زمين کي تباهيءَ کان بچائڻ لاءِ مختلف اپائن جا اعلان ۽ فيصلا ڪيا ويا. ڌرتيءَ تي ڪيميائي زهرن جي اثر کان بچڻ ، فالتو ۽ گندي مواد جو نيڪال ڪرڻ، توانائيءَ جا نوان ذريعا ڳولڻ ، عوامي ٽرانسپورٽ سرشتي کي بهتر بنائڻ، پاڻيءَ جي اڻاٺ کي مُنهن ڏيڻ ، تبديل ٿيندڙ ماحول جو حل ڳولڻ ۽ ٻيلا بچائڻ سميت مختلف معاملا بحث هيٺ آيا. ان سلسلي ۾ ماحوليات، حياتيات، جنگلات ۽ موسمي تبديلين تي عمل بابت سخت ٺهراءَ پاس ڪيا ويا.