بنيادي طور هي اصطلاح يوناني لفظ Kosmopolites (عالمي شهري) مان نڪتل آهي ۽ جيڪو سماجي، سياسي فڪر ۽ اعليٰ قدرن سان واڳيل زندگيءَ جي معيارن کي ظاهر ڪري ٿو. جڏهن ته نظريي طور ان مان مُراد اهڙن انسانن جي گڏيل ورثي جي آهي، جيڪي پنهنجي سياسي واسطيدارين کان مٿانهان ٿي، بين الاقوامي قدرن موجب هڪ برادريءَ جو حصو بڻجي اُن برادريءَ جي ڀلائيءَ ۽ ناماچاري لاءِ جاکوڙين ٿا. مُختلف وضاحتن تحت ”گڏيل آفاقي قدرن وار نظام“ (Cosmopolitanism) جي نظريي ۾ يقين رکندڙ شهري، سياسي ادارا جوڙڻ، اخلاقي قدرن کي ڦهلائڻ، منڊيءَ جي ڀاڱي واري ۽ ثقافتي اظهارن جي ڀائيواريءَ سميت ڪيترن ئي شعبن ۾ پنهنجو ڀاڱو ڳنڍين ٿا. هڪ نظريي جي طور، اهو سڀني شهرين جي مسئلن ڏانهن گهڻ رُخي حل جي جستجو ڪرڻ، مقامي سطح تي شهري نظام قائم ڪرڻ، ڌرمي بُنيادن تي گڏيل ثقافت جوڙڻ ۽ ٻين گڏيل دلچسپيءَ جي معاملن ۾ گڏيل اڳڀرائيءَ تي زور ڏئي ٿو. دُنيا جا وڏا شهر مختلف نسلن ۽ قومن جي آباديءَ سان سٿيل هُجڻ سبب هڪ اهڙو شهري نظام جوڙين ٿا، جيڪوڪنهن هڪ قوم يا نسل جي بالادستيءَ کي ختم ڪري، سڀني شهرين کي هڪ جهڙا موقعا ۽ آزاديون ۽ حق ڏيئي ترقيءَ ۽ فلاح تائين پُهچي ٿو