Corticosteroid drugs

ڪور.ٽي.ڪو.سٽِي.روائڊ ـ ڊرگس

دوائن جو ھڪ اھڙو گروپ جيڪو ڪورٽيڪوسٽيروائڊ (corticosteroid) ھارمونن جھڙو ٿئي ٿو جيڪي اَڊرينل (adrenal) غدود پيدا ڪن ٿا. ڪورٽيڪوسٽيروائڊ، ايڊيسن بيماريءَ (Addisons’ disease) ۾ ۽ جڏھن اَڊرينل (adrenal) غدود يا پٽيوئيٽري (pituitary) غدود تباه ٿي يا خارج ڪري ڇڏجن ٿا تڏھن ھارمون ريپليسمينٽ ٿراپيءَ طور استعمال ڪجن ٿا. ان کانسواءِ آنڊن جي سوزشي تڪليفن جھڙوڪ: السريٽو ڪولائيٽس (ulcerative colitis) ۽ ڪروھنس (Crohn’s disease) بيماريءَ جي علاج طور ته ٽيمپورل آرٽيرائيٽس (remporal arteritis) جي حالت ۾ تنتي پردي (retina) کي رت مھيا ڪندڙ شريان جي سوزش جي ھنگامي علاج لاءِ به استعمال ڪجن ٿا. علاج طور انھن جا ٻيا استعمال آٽواِميون (autoimmune) بيمارين ۾ جھڙوڪ: سِسٽيمِڪ لُوپس اَريٿيميٽوسس (lupus erythematosus)، ريُوميٽوائڊ آرٿرائيٽس (rheumatoid arhritis)، دم، (asthma)، مَلي (eczema) ۽ ايلرجڪ رانائيٽس (allergic rhinitis) جي علاج لاءِ ڏجن ٿا. ڪورٽيڪوسٽيروائڊ دوائون، ٽرانسپلانٽ سرجريءَ (transplant surgery) کانپوءِ عضوي جي رد ٿيڻ کان بچڻ ۽ ڪن قسمن جي ڪينسر جي علاج جھڙوڪ: لِمفوما (lymphoma) يا ليڪِوميا (leukaemia) لاءِ ڏجن ٿيون. ڪورٽيڪوسٽيروائڊ انجيڪشنون ڪن قسمن جي سورن جھڙوڪ: ٽينس اَيلبو (tennis elbow) ۽ آرٿرائيٽس (arthritis) ختم ڪرڻ لاءِ ڏجن ٿيون.