Cats, diseases from

ڪيٽ ـ ڊزيزز ـ فرام

ڪيترن مختلف قسمن جا پئراسائيٽ ۽ روڳ ٻلين مان انسانن ۾ وچڙي سگهن ٿا. جن ۾ ھڙڪ (rabies) سنگين بيماري ٿئي ٿي. ڪيٽ ـ اسڪريچ ـ فِيور (cat-scratch fever) ورلي ٿيندڙ بيماري، ٻليءَ جي رھڙڻ يا چڪ پائڻ جي ڪري بارٽونيلا ھينسلي (Bartonella henselae) بئڪٽيريا سبب ٿي پوي ٿي. عام طور تي ٻلين ۾ ھڪ پروٽوزوني (protozoan) پئراسائيٽ ٽوڪسوپلازما گونڊي (Toxoplasma gondii) ٿئي ٿو جيڪو ٽوڪسوپلازموسس (toxoplasmosis) جي بيماري پيدا ڪري ٿو. عام طور تي ٻلين جي ڪرفتيءَ سان لاڳاپي ۾ اچڻ سان سنگين بيماري پيدا نٿي ٿئي پر جڏھن ڪا عورت حمل سان ھوندي ان سان لاڳاپي ۾ اچي ته سنگين ثابت ٿي سگهي ٿي جو ممڪن ٿئي ٿو ته ٻليءَ جي ڪرفتيءَ ۾ ڪينئن (roundworm) جا آنا ھجن ۽ اھي ٽوڪسوڪيرياسس (toxocariasis) جي بيماري پيدا ڪري وجهن. ورلي، پيٽ ۾ داخل ٿيل ڪينئين جو آنو اک تائين رسي وڃي ته نه رڳو ديد متاثر ڪري وجهي ٿو ته نابينائپ به پيدا ڪري سگهي ٿو. جيڪي ٻار ٻاھر، ٻليءَ جي ڪرفتيءَ سبب غليظ ٿيل مٽيءَ ۾ رانديون ڪن ٿا اھي عام طور تي متاثر ٿي پون ٿا. ٻلين سبب انسانن ۾ ٻيون تڪليفون ڏڍ (tinea)، چمڙيءَ جا ڦنگي روڳ، ٻلين جي ڪارڙن (fleas) جي چڪڻ سبب الرجيءَ جي ردعمل سميت ٻڦو يا ڏَڏر (urticaria) پيدا ٿي سگهن ٿا. صحت صفائي رکڻ، بيمار جانورن جي صحت ڏانھن ڌيان ڏيڻ انھن جي ڪينئن ۽ ڪارڙن جي سدائين علاج ڪرائڻ سان ٻلين جي بيمارين کان بچي سگهجي ٿو.