ڪنهن به هڪ رياست طرفان ٻيءَ رياست جي پاليسين ۽ عملن تي عدم اعتماد ظاهر ڪندي ان جي اختيار ڪيل روين تي اعتراض واري، ساڻس سفارتي لاڳاپن جي خاتمي جو اعلان ڪرڻ، کان پوءِ ٻنهي رياستن وچ ۾ روايتي ۽ عام رواجي سفارتي تعلقات ختم ٿي ويندا آهن. عام طور تي ان قدم کي ”غير صحتمند“ سمجهيو ويندو آهي، ڇاڪاڻ جو ٻن ملڪن وچ ۾ سفارتي لاڳاپن جي ٽُٽڻ جي ٻيو مطلب سندن وچ ۾ ڇڪتاڻ جو شروع ٿيڻ هوندو آهي. جيئن ته ڪنهن به تڪراري صورتحال جو پرامن حل فقط مذاڪرات ذريعي ئي ممڪن هوندو آهي، تنهنڪري هڪ ملڪ طرفان ٻئي ملڪ سان تعلقات ختم ڪرڻ سبب سندن وچ ۾ موجود تڪرار جي حل لاءِ غير فوجي رابطا ختم ٿيڻ جي صورت ۾ فقط فوجي ڪارروائي جو رستو بچندو آهي. اهڙي طرح سفارتڪاريءَ جي جڏهن سڀ کان وڏي ضرورت هوندي آهي تڏهن اهي لاڳاپا ئي بحال نه رهندا آهن. ان صورتحال کان بچڻ لاءِ ٻن ملڪن وچ ۾ پيدا ٿيندڙ تڪراري صورتحال کي وڌيڪ اينگهائڻ کان بچائيندي، هڪ بهتر حڪومت سفارتي لاڳاپا مڪمل طور تي ٽوڙڻ بجاءِ احتجاجي طور پنهنجي نمائندي کي واپس گهرائي وٺندي آهي جنهن ڪري سفارتخانو پنهنجيون عام روايتي سرگرميون جاري رکي سگهندو آهي، اهڙي صورتحال کي سفارتڪاريءَ ۾ ڪنهن ۾ شخص جي ”مُنهن بجاءِ نڪ ڪپڻ“ واري صورتحال سان ڀيٽي سگهجي ٿو، تنهنڪري ذميوار ۽ سَمجهو حڪومتون پنهنجي سفيرن کي احتجاج طور گهرائي نيون هدايتون ڏيئي واپس ذميواريون ادا ڪرڻ لاءِ مقرريءَ واري مُلڪ موڪلينديون آهن. ان عمل سان احتجاج ۽ پر امن مذاڪرات لاءِ مناسب حڪمت عملي جڙي سگهندي آهي. عام طور سفارتي لاڳاپن جي ٽُٽڻ کان پوءِ ٻنهي رياستن جي مُفادن جو خيال، ڪا ٽين دوست رياست رکندي آهي. سفارتي ناتا ٽٽُڻ باوجود، ٻئي رياستون هڪٻئي جي سفارتي نمائندن کي، قانوني طور مليل سهولتن ۽ تحفظن کي يقيني بنائڻ لاءِ پابند هونديون آهن. ان کان علاوه سفارتخانو بند ڪندڙ رياست، پنهنجا اهم دستاويز ۽ ڪاغذ پَٽَ مهر بند ڪري، ساڳئي رياست ۾ موجود ڪنهن ٽين دوست رياست وٽ امانت طور رکڻ لاءِ مُکياري هونديون آهن. هتي سفارتي لاڳاپن جي مُڪمل خاتمي ۽ سفارت بند ڪرڻ يا ختم ڪرڻ ۽ مڪمل طور سفارتي ناتا ٽوڙي ڇڏڻ وارين صورتحالن ۾ فرق محسوس ڪرڻ جي ضرورت آهي. پهرين صورتحال ۾ ڪا به هڪ رياست پنهنجي سفارت خاني کي رضاڪارانه طور مليل اختيارن جي استعمال سان بند ڪندي آهي، جنهن کي مُناسب موقعي يا تبديل ٿيل حالتن ۾ ٻيهر کولڻ ممڪن هوندو آهي. جڏهن ته پوئين صورتحال ۾ لاڳاپيل ٻئي رياستون سفارتخانا بند ڪرڻ جو فيصلو ڪندا آهن، جيڪو عمل عام طرح حالتن جي دٻاءَ جو نتيجو هوندو آهي