Basal cell carcinoma

بي.سل ـ سيل ـ ڪارسينوما

چمڙيءَ جي ڪينسر جو ھڪ قسم جنھن کي روڊينٽ السر (rodent ulcer) يا بي سي سي (BCC) جي نالي سان به سڏجي، گهڻي عام منھن يا ڳچيءَ تي ٿي پوي ٿي. ھڪ ننڍڙي، تراکڙي ڳوڙھيءَ جيان اڀري آھستي آھستي تراکڙيءَ السر جي صورت ۾ پيدا ٿئي ٿي جنھن جا ڪنارا موتين جھڙا اڀريل ٿين ٿا. بيسل سيل ڪارسينوما جو ڪارڻ، سج جي الٽراوايوليٽ ڪرڻن سبب چمڙيءَ جو تباه ٿيڻ آھي. جنھن ۾ 50 سالن جي عمر کان مٿي سفيد چمڙيءَ وارا فرد عام طور تي شڪار ٿين ٿا، گهري ۽ ڪاريءَ چمڙيءَ وارن فردن ۾ چمڙيءَ جي ميلانن (melanin) پگمينٽ ججهي مقدار ۾ ھجڻ سبب بچيل رھن ٿا. ھن ڪينسر جي خطري کان بچڻ لاءِ سج ۾ گهڻو وائکو نه ٿيڻ، سن اسڪرين (sunscreens) استعمال ڪرڻ، بچاءَ جون پوشاڪون پائڻ ۽ اس کان بچاءَ لاءِ ٽوپلا پائڻ گهرجن. علاج نه ٿيڻ سبب ڪارسينوما آھستي آھستي آسپاس جي ماس کي تباه ڪري ڇڏي ٿي ته جسم جي ٻين حصن ڏانھن بنھه نٿي وگهري. علاج لاءِ ڪرايوٿراپي (cryotherapy)، ٽاپيڪل ڪيموٿراپي (topical chemotherapy)، سرجري يا ورلي حالتن ۾ ريڊيوٿراپي (radiotherapy) ڪئي وڃي ٿي جنھن سان مڪمل شفا ٿئي ٿي. ممڪن ٿئي ٿو ته پلاسٽڪ سرجري به ڪئي وڃي جنھن جو مدار ڪينسري ڳوڙھيءَ جي ھنڌ ۽ سائيز تي ٿئي ٿو. جن فردن کي اڳ ۾ بيسل سيل ڪارسينوما ٿي چڪي ھوندي آھي تن کي نيون ڳوڙھيون پيدا ٿي سگهن ٿيون تنھنڪري چمڙيءَ ۾ پيدا ٿيندڙ ڪنھن به تبديليءَ لاءِ خبردار رھڻ گهرجي (وڌيڪ ڏسو، melanoma, malignant; squamous cell carcinoma, sunlight, adverse effects of ).