Atherosclerosis

اٿِي.رو.اسڪلي.رو.سِس

ڪولسٽيرال (cholesterol) ۽ ٻين سڻڀن مادن (lipids) جو شريانن جي ڀتين تي گڏ ٿي ان کي سوڙھو ڪري ڇڏڻ. اٿيرواسڪليروسس جسم جي ڪنھن به حصي جي شريانن کي متاثر ڪري سگهي ٿي ۽ فالج (stroke)، ھرٽ اٽئڪ (heart attack، ڏسو، myocardial infarction) ۽ ٽنگن ڏانھن اڻ پوريءَ گردش ڪرائڻ جو مکيو ڪارڻ ٿئي ٿي. جڏھن سڻڀو مادو جھڙوڪ: ڪوليسٽيرال رت رستي شريانن جي اندرين تھه ۾ گڏ ٿي ھڪ پيلو مادو، اٿيروما (atheroma) جوڙڻ شروع ڪري ٿو تڏھن شريانون سوڙھيون ٿي وڃن ٿيون. اھڙي لَٽ (deposits) سبب شريانن مان رت جو وھڪرو محدود ٿي وڃي ٿو. ان کانسواءِ ان شريان جي ڀت جو مشڪي تھه ٿلهو ٿي شريان کي تھائين سوڙھو ڪري ڇڏي ٿو. رت جا ريزا (platelets، دڳ پيدا ڪندڙ وکر) لَٽ جي مٿاڇري تي گڏ ٿي رت جا دڳ پيدا ڪرڻ شروع ڪن ٿا. ڪو به وڏو دڳ ان شريان کي مڪمل طور تي ٻنجي سگهي ٿو جنھن جي نتيجي ۾ جنھن عضوي کي رت مھيا ٿئي ٿي اھو آڪسيجن کان وانجهيل رھي ٿو.