Alcohol-related disorders

ال.ڪو.حل ـ رِ.لي.ٽيڊ ـ ڊس.ئار.ڊرس

الڪوحل جي گهڻي ۽ ڊگهي عرصي تائين واپرائڻ سبب پيدا ٿيندڙ مختلف قسمن جون جسماني ۽ ذھني بيماريون. گهڻي الڪوحل پيئڻ سان وات، ڄڀ، نڙيءَ، آوازي ڏورين ۽ لڪيءَ جي ڪينسر ٿيڻ جا خطرا خاص طور تي تڏھن وڌي وڃن ٿا جڏھن ان سان گڏ تماڪ به ڇڪجي ٿو. شراب پيئندڙن ۾ جيري جي ڪينسر سميت جيري جون بيماريون؛ الڪوحلي ھيپيٽائيٽس (hepatitis) ۽ سروسِس (cirrhosis) ٿيڻ جا گهڻا خطرا ٿين ٿا. گهڻي شراب پيئڻ سان ڪارڊيوماياپيٿي (cardiomyopathy)، ھائپرٽينشن (hypertension)، ايٽريئل فبريليشن (atrial fibrillation) ۽ فالج (stroke) ٿيڻ جا خطرا وڌي وڃن ٿا. الڪوحل، ھاضمي جي ناليءَ کي مشتعل ڪري گئسٽرائيٽس (gastritis) ۽ پئنڪرياٽيٽس (pancreatitis) پيدا ڪري سگهي ٿو. حمل دوران گهڻي شراب پيئڻ سبب ڇڪيءَ اچڻ ۽ فيٽل الڪوحل سنڊروم (fetal alcohol syndrome) پيدا ٿيڻ جا امڪان وڌي وڃن ٿا. شرابي پريشانيءَ (anxiety)، اداسائي (depression) ۽ ذاتي ٻڏتر سميت ڊِمينشيا (dementia) ۾ به مبتلا ٿي سگهن ٿا.