”عمل ۽ رد عمل“ واري تصور جو تعلق، انهن ٻن ڌرين يا ملڪن سان هوندو آهي، جيڪي ڪن به سببن جي ڪري هڪ ٻئي سان حسد ۽ مقابلو ڪن ٿا. ان حوالي سان ڪنهن به هڪ پاسي يا ڌُر جي طرف کان ڪو عمل سامهون ايندو ته ٻئي پاسي يا ٻيءَ ڌر کان ِِضرور ان جو رد عمل ايندو. جڳ مشهور ڪتاب ”هٿيار ۽ عدم سلامتي“ (Arms and Insecurity) جي ليکڪ ’ليوِس فراءِ رچرڊسَن‘ (Lewis Fry Richardson) مطابق اها هڪ اهڙي حالت هوندي آهي، جنهن ۾ جيڪڏهن ملڪ ”الف “ پنهنجي حفاظت خاطر فوجي بجيٽ وڌائي ٿو، ته ان جي جواب ۾ ملڪ ”ب“ به پنهنجي فوجي بجيٽ وڌائي ڇڏي ٿو. ”عمل ۽ رد عمل“ واري اصطلاح جوهڪ وڏو مثال پاڪستان- ڀارت تعلقات جو آهي. جڏهن به ٻنهي ملڪن منجهان ڪو هڪ فوجي بجيٽ وڌائيندو يا ائٽمي تجربا ڪندو ته ٻيو ملڪ به جواب ۾ ضرور ائين ئي ڪندو آهي. عمل ۽ رد عمل ذريعي هٿيارن جي ڊوڙ سميت بين الاقوامي تڪرارن کي هٿي ملي ٿي