عورتن ، مردن ۽ ٻارن سميت سموري انساني آباديءَ کي معياري ۽ سُکي زندگي مهيا ڪرڻ جي سلسلي ۾ گڏيل قومن جو هي ادارو11- جولاءِ 1967ع تي United Nations Fund for Population Activities ) جي نالي سان قائم ڪيو ويو، جيڪو اڄ به ‘جنرل اسيمبليءَ’ جي نگرانيءَ ۾ انساني ڀلائيءَ (خاص ڪري پوئتي پيل طبقن) جي سلسلي ۾  United Nations Development Fund جي نئين نالي سان (1987ع کان) جاکوڙي رهيو آهي . ان سلسلي ۾ مختلف ملڪن جي آباديءَ جي تناسب جي جائزي ، آدمشماريءَ ۽ عالمي معيار جي ڪيل ڪٿ مطابق صنفي ۽ طبقاتي متڀيد مٽائڻ ، اقليتن کي گهربل حق ڏيارڻ ۽ غُربت گهٽائڻ لاءِ سهولتون مهيا ڪرڻ ۽ اُپاءَ وٺڻ لاءِ اڳڀرائي ڪري ٿو. هن. اداري جي اهم مقصدن ۾ دنيا جي هر ٻار جي ڄم کي محفوظ بڻائڻ ، ماءُ کي ويم دوران سهائتا/ سهولت ڏيڻ ، انساني آباديءَ کي ‘ايڊز’ سميت جنسي مرضن کان بچائڻ ۽ هر نياڻيءَ/ عورت جي عزت ۽ وقار کي محفوظ ڪرڻ سميت اهي سڀ نُڪتا شامل آهن ، ته جيئن ڪمزور ۽ ٿورائيءَ تي ٻڌل انساني آباديءَ جي ڀلائي ممڪن ٿي سگهي . ان سلسلي ۾ انساني نسل جي حفاظت ڀري افزائش جي سلسلي ۾ رياستي سطح تي ٿيندر رٿابنديءَ ۽ قانون سازيءَ تي زور ڏيڻ ، پوئتي پيل آبادين جي ترقيءَ لاءِ ملڪي ۽ عالمي سطح تي امدادي سهڪار آڇڻ ۽ مهاجر آباديءَ ، پوڙهن ، معذور۽ نٻل انسانن جي پُٺڀرائيءَ سميت مختف اڳڀرايون ڪيون وڃن ٿيون. هي ادارو دنيا جي 150 کان وڌيڪ ملڪن ۽ جاين تي پنهنجو سهڪار آڇيندي تمام گهڻين رٿائن تي ڪم ڪري رهيو آهي