ڪنهن به مُلڪ طرفان ٿيندڙ اهڙو عمل جنهن سان بين الاقوامي اصولن ۽ ضابطن جي ڀڃڪڙي ٿئي ۽ اُهو عالمي سطح تي هاڃيڪار ثابت ٿئي، ته لاڳاپيل مُلڪ جي حوصلاشڪنيءَ لاءِ، ان ملڪ کي مُختلف قانوني تقاضائون پوريون ڪندي گهربل سزا ڏني ويندي آهي. انهيءَ سڄي عمل کي Retortion جي اصطلاح سان سڃاتو وڃي ٿو. ان سلسلي ۾ آمريڪي پارليامينٽ طرفان جوڙيل مشهور ”هڪنلوپر ترميم“ (Hickenlooper Amendment) ذريعي هن اصطلاح کي متعارف ڪرايو ويو. جنهن مطابق ضرورت پوڻ تي، آمريڪا جي حڪومت ڪنهن به وقت اهڙن ملڪن جي امداد بند ڪري سگهي ٿي، جيڪي آمريڪا جي خلاف ڪو سنئون سڌو قدم کڻن، يا آمريڪا جي ڪنهن مُفاد کي سخت نقصان رسائين. 1963ع ۾ جڏهن سيلون ۽ آمريڪا جي سرڪارن جي وچ ۾ اهڙا تڪراري مسئلا پيدا ٿيا، ته آمريڪا ”ريٽارشن“ جي قانون مطابق سيلون لاءِ ڏنل امداد بند ڪئي هئي. سيلون جڏهن آمريڪي تحفظات جي تلافي ڪندي، آمريڪا کي نقصان ڀري ڏيڻ جو معاهدو ڪيو، تڏهن آمريڪا مٿانئس پابنديون هٽايون. هن عمل کي ”آمريڪن فارين اسٽنسس ايڪٽ 1973ع“ تحت گهربل تقاضائون پوريون ڪندي لاڳو ڪيو ويندو آهي