هي هڪ جنگ مُخالف حلقو آهي، جيڪو گهڻو تڻو امن پسند عورتن تي ٻڌل آهي. هن حلقي جي دعويٰ مطابق، اُهو افغانستان ۽ عراق ۾ آمريڪا طرفان شروع ڪيل جنگين جي خاتمي، دُنيا ۾ نين جنگين جي روڪٿام ۽ انساني وسيلن جي صحت، تعليم ، ماحول دوست روزگار ۽ زندگيءَ جي هاڪاري رُخ ۾ اوسر ڪندڙ شعبن ۾ سيڙپ ڪرڻ تي زور ڏئي ٿو. جيئن ته هِن حلقي جي طرفان گُلابي رنگ کي سُڃاڻپ جو اُهڃاڻ بڻايو ويو آهي ۽ تنظيم جو هر ميمبر پنهنجي جسم تي گُلابي رنگ جي نشاني هڻڻ لاءِ پابند آهي، تنهنڪري اُن کي Code Pink جو نالو ڏنو ويو آهي. سندس ميمبرن جي اڪثريت پنهنجي فڪري لاڙن ۾ مارڪسوادي ۽ سرمائيدار مخالفن ۾ اڳڀري آهي، هن تنظيمن جي اڳرائي مشهور عورت وادي خاتون، مَديا بئنجامن (Madea Binjamin) جي هٿ ۾ آهي. هيءُ حلقو جنگ مُخالف مظاهرا ڪرائڻ، امن ڪانفرنسون ڪوٺائڻ ۽ عالمي ميڊيا تي عوام دوست موقف پيش ڪرڻ جي حوالي سان دُنيا ۾ شهرت رکي ٿو. هن تنظيم نيويارڪ شهر ۽ واشنگٽن ڊي سي جهڙن اهم آمريڪي شهرن کان سواءِ، دُنيا جي ٻين مُختلف مُلڪن ۾ به پنهنجا دفتر کوليا آهن . تنظيم جو بُنياد آڪٽوبر 2002ع ۾ عورتاڻن حقن جي مشهور ڪارڪن جُوڊي ايوانس (Jodie Evans) وڌو ۽ پنهنجي پهرين سرگرميءَ دوران، هن خاتون 10 هزار ماڻهن کي ” عورتن جي بين الاقوامي ڏهاڙي“ تي وائيٽ هائوس آڏو گڏ ڪري، آمريڪي پاليسين خلاف احتجاج درج ڪرايو.