هيءُ اصلاح مشهور مشروب ”ڪوڪاڪولا“ ۽ ”ڀونءِ واد“ جي ذريعي دنيا ۾ ڦهليل ”ثقافتي بيٺڪيت“ (Cultural Colonization ) جي ميلاپ کي ظاهر ڪندي، سڄي ڌرتيءَ تي گهڻ قومي ڪمپنين جي نظرن کان اوجهل بادشاهيءَ ڏانهن اشارو ڪري ٿو. هن تصور ذريعي اولهه جي پيداواري وکرن جي غريب ملڪن ڏانهن ٿيندڙ ايڪسپورٽ ۽ اولهه (خاص طور آمريڪا) طرفان پوئتي پيل ملڪن جي مٿان ٿيندڙ ثقافتي يلغار جي منظر ڪشي ٿئي ٿي. هي اصطلاح 1994ع وارن ڏينهن کان، فرانس جي ڪميونسٽ لٽريچر ۾، سامراج جي نون هٿڪنڊن کي نشانبر ڪرڻ لاءِ استعمال ٿيندو رهيو آهي ۽ وقت گذرڻ سان گڏ ڀونءِ -واد مخالف تحريڪ جي مقبول نعري طور به استعمال ڪيو ويندو آهي. 1994ع ۾ آمريڪي ڪمپنين ۽ ثقافت جي يورپ مٿان ٿيل ڪاروباري ڪاهه کي واضح ڪرڻ لاءِ ، Reinhold Wagnleitner جي ڪتاب Cocacoloniztion and the Cold War ۾ پڻ ڪثرت سان ڪتب آندو ويو. ان کان علاوه طبي سائنس ۾ پڻ هن اصطلاح کي عالمي سطح تي زندگيءَ جي معيار ۾ ايندڙ تبديلين کي بيان ڪرڻ ۽ ڪن خاص بيمارين بابت آگاهيءَ جي حوالي سان استعمال ڪيو ويندو آهي.