آمريڪي پرڏيهي وزير مارشل جي جوڙيل ”مارشل رٿا“ جي ٽوڙ لاءِ 5 آڪٽوبر 1947ع ۾ وارسا (پولئنڊ) ۾ يوگو سلاويا، بلغاريا، روم، هنگري، پولنڊ، روس، فرانس، چيڪوسلواڪيه ۽ اٽليءَ جي ڪميونسٽ پارٽين Communist Information Bureau (Cominiform) جي نالي سان معلوماتي ۽ اطلاعاتي تعاون جوڳو اتحاد ٺاهيو، جنهن جو مقصد اُنهن مُلڪن جي ڪميونسٽ پارٽين جي پاليسين ۾ هڪجهڙائي پيدا ڪرڻ ۽ ”مارشل رٿا“ کي ناڪاره بنائڻ هو. 1944ع ۾ سوويت يونين جي ڪميونسٽ اڳواڻ جوزف اسٽالن ڪميونسٽن جي عالمي تنظيم ”ڪومينٽرن“ کي ٽوڙي هيءَ تنظيم قائم ڪئي ۽ ان کي عالمي سطح تي ڪميونسٽ انقلاب آڻڻ جي ڏس ۾ رٿائون جوڙڻ جو ڪم ڏنو ويو. بُنيادي طور اهو هڪ پروپئگنڊائي ادارو هو، جنهن جو ڪم سوويت يونين جي هدايتن هيٺ مُوڙي واد دُنيا (Capitalism)خلاف ۽ ڪميونسٽ حُڪومتن جي حمايت ۾ پرچار ڪرڻ هو.