هڪ رٿا، جنهن جو مقصد ڏکڻ ۽ اُوڀر ايشيا، ڪئناڊا، برطانيا ۽ آمريڪا جي وچ ۾ سهڪار جي بنياد تي مالي ۽ فني امداد جي فراهمي آهي. جيئن ته اِن رٿا جو مقصد اهڙي تعاون جي سلسلي ۾ فقط هڪ ذريعو بڻجڻ آهي، تنهن ڪري ان جو ڪو مستقل هيڊ ڪوارٽر ڪونهي، پر لک پڙهه جو رڪارڊ رکڻ ۽ اطلاع ڏيڻ لاءِ ڪولمبو ۾ بيورو آفيس قائم ٿيل اٿس. هيءَ رٿا ميمبر مُلڪن جي پرڏيهي وزيرن جي ڪولمبو ۾ ٿيل ڪانفرنس جي نتيجي ۾ جنوري 1950ع ۾ قائم ٿي. ان جو رسمي افتتاح 1جولاءِ 1951ع تي ڪولمبو ۾ ٿيو. 1980ع کان اها رٿا غير موثر آهي. مُنڍ ۾ هندستان، پاڪستان، سريلنڪا، نيوزيلينڊ، ڪئناڊا، آسٽريليا ۽ برطانيا اُن جا ميمبر هئا. پر بعد ۾ آمريڪا ۽ جاپان سميت ٻيا ملڪ به ميمبر بڻيا ۽ ميمبرن جو تعداد 27 کي پهتو. رٿا جي ڪم جو دائرو هر سال ٿيندڙ مک گڏجاڻيءَ ۾ مقرر ٿيندو هو.