هن عمل ذريعي نشي جي ڪاروبار، دهشتگرديءَ ۽ ٻين غيرقانوني ذريعن مان هٿ ڪيل ڪاري ڌَنَ/ آمدنيءَ جا اصل پار پَتا لڪائي ان کي اڇو ڪري جائز شڪل ڏني وڃي ٿي. جيتوڻيڪ دنيا ۾ ڪاري ناڻي بابت درست انگ اکر موجود ناهن، پراها ايڏي وڏي انگ ۾ ضرور ٿئي ٿي، جو ڪيترن ملڪن جون حڪومتون ان سلسلي ۾ تمام گهڻين مشڪلاتن کي منهن ڏين ٿيون. انهيءَ ڪري حڪومتون توڙي بين الاقوامي ادارا ان ڏس ۾ تمام گهڻا اُپاءَ وٺن ٿا. ان حوالي سان ’ڪارو ناڻو لڪائڻ جي عمل خلاف مالي ضابطن واري خصوصي مهم- ڪارحلقو‘ [Financial Action Task Force against Money Laundering (FATF)] جهڙا ادارا قائم ڪيا ويا آهن، جيڪي عالمي سطح تي وڏي پڪڙ پڇاڙ ڪن ٿا. ان جي باوجود ’آءِ ايم ايف‘ جي اندازي موجب دنيا جي سموري معيشيت ۾ گردش ڪندڙ پنج سيڪڙو ناڻو ناجائز آهي. ڪاري ناڻي کي اڇو بڻائڻ جو عمل ٽن طريقن سان ٿيندو آهي. (1) ناڻي کي روڪڙ جي صورت ۾ معاشي سرشتي جو حصو بڻايو ويندو آهي. (2) ڳجهين ۽ پيچيده طريقن سان دوکو ڏيئي غيرقانوني آمدنيءَ جي وسيلن کي لڪايو ويندو آهي. ۽ (3) غيرقانوني آمدنيءَ مان وڌيڪ نفعا ۽ ملڪيت حاصل ڪئي ويندي آهي. هي عمل روايتي بئنڪ جي طريقي سان، رقم کي شڪ کان بچائڻ لاءِ ننڍي روڪڙ/ کاتن ۾ ورهائڻ ۽ جمع ڪرائڻ (Smurfing) ذريعي، ناڻي جي هڪ ملڪ کان ٻئي ملڪ سمگلنگ ذريعي، روڪ رقم جي ذريعي وکر خريد ڪري جائز طريقي سان انهن کي منڊيءَ ۾ وڪڻڻ سان، خيراتي ادارا جوڙي انهن جي روڪڙي آمدني ۽ خرچ ڏيکارڻ سان ، جواخانن ۾ معمولي جوا کيڏي باقي رقم جو چيڪ وٺي بئنڪ ۾ جمع ڪرائڻ سان، هٿ ٺوڪين ڪمپنين ۾ جعلي ملازمن کي نقد رقم ورهائڻ سان ۽ ملڪيتن جي وٺڻ ۽ وڪڻڻ سميت بيشمار ٻيا طريقا شامل آهن. هن ڪُڌي ڪاروبار ۾ حڪومتن ۽ غير سرڪاري ادارن کان سواءِ ڏوهاري حلقا به شامل آهن. جيڪي جديد ٽيڪنالاجيءَ ذريعي تمام وڏي هوشياريءَ سان پنهنجون سرگرميون جاري رکن ٿا