ٻن رياستن جي وچ ۾ طئي ڪيل معاهدو ، جنهن ذريعي اُهي ڏوهاري سرگرمين ۾ ملوث ماڻهن يا سزا کاڌل ڏوهارين جي ٻانهه ڏوهه جي واردات ٿيل رياست/حڪومت /اختياريءَ کي ڏيڻ لاءِ پابند هونديون آهن ته جيئن ڏوهاري مليل سزا ڀوڳي سگهن يا قانوني ڪارروائيءَ کي منهن ڏيئي سگهن . عام طور تي هر رياست خودمُختيار هئڻ سبب سندس سرحدن اندر رهندڙ هر شهريءَ جي حفاظت جو حق رکي ٿي . ان ڪري اها ڪنهن به الزام يا ڪيل ڏوهه جي بنياد تي پنهنجي ڪنهن به شهريءَ/رهاڪوءَکي زوريءَ يا گذارش تي ڪنهن به ٻيءَ رياست جي حوالي ڪرڻ لاءِ پابند نه آهي . بلڪه هن طرفان ڪيل ڪنهن به ڏوهه تي مُلڪي قانون هيٺ ڪارروائي ڪرڻ جو حق رکي ٿي . ان ڪري ڏوهاري شخص جي حوالگيءَ لاءَ خاص معاهدن جي ضرورت پوي ٿي . ’حوالگيءَ‘ جو عمل لاڳاپيل شخص کي ملڪي هوائي اَڏي تان واپس ڪرڻ، ملڪي سرحدن ۾ داخلا جي اجازت نه ڏيڻ ، مقامي عدالت ۾ مقدمي کي منهن ڏيندڙ شخص جي مقدمي کي (ڪنهن بين الاقوامي اداري يا اختياريءَ جي چوڻ تي ) منتقل ڪرڻ ۽ ڪنهن خطي سان لاڳاپيل ملڪ جي درخواست تي ملزم/ڏوهاريءَ کي پيش ڪرڻ ذريعي مڪمل ڪري سگهجي ٿو . ’حوالگيءَ‘ جو سلسلو عدالت يا انتظامي ۽ گڏيل به ٿي سگهي ٿو . ڏوهاريءَ کي حوالي ڪرڻ کان اڳ مقامي اختيارين کي مٿانئس لڳايل الزامن ۽ مقدمي جي مضبوط هجڻ بابت پڪ ڪرڻ جو حق حاصل هوندو آهي