ڏاکڻي- اوڀر ايشيا جي مُلڪن ۾ جولاءِ 1997ع کان شروع ٿيل مالي گهوٽالو ، جنهن سڄي دنيا کي پنهنجي لپيٽ ۾ آڻي ڇڏيو . ان جي شروعات ٿائيلئنڊ کان ٿي، جڏهن اُتان جي حڪومت پنهنجي سڪي ’ڀات‘ جو مُلهه آمريڪي ڊالر جي ڀيٽ ۾ گهٽائي ، پراپرٽيءَ جي ڪاروبار ۾ آيل بُحران تي بند ٻڌڻ جي ڪوشش ڪئي . ڏسندي ئي ڏسندي ان قدم جا اثر ڏاکڻي- اوڀر ايشيائي ملڪن ۽ جاپان تي پوڻ لڳا ۽ سندن ملڪي سڪي جو ملهه ڪرڻ سميت ملڪي قرض ۾ واڌارو ۽ اثاثن جي ملهه ۾ لاٿ اچي وئي .ٿائيلنڊ ، ڏکڻ ڪوريا ۽ انڊونيشيا هن گهوٽالي جي سخت وڪڙ ۾ آيا ، جڏهن ته هانگ ڪانگ ، ملائيشيا ، فلپينس ۽ لائوس کي به مالي جهٽڪا مليا . ساڳئي گهوٽالي جا اثر چين ، ڀارت ، تائيوان ، سنگاپور ، برونائي ۽ ويٽنام ۾ به ڏٺا ويا . ان صورتحال کي ٻُنجو ڏيڻ لاءِ ’آئي ايم ايف‘ 40 بلين ڊالر سيڙائي لاڳاپيل ملڪن کي گهوٽالي مان ٻاهر ڪڍڻ جي رٿا جوڙي . ان جي نتيجي ۾ 1998ع کان متاثر ملڪن ۾ بهتريءَ جي صورتحال پيدا ٿي .