عام طور تي هي اصطلاح ڪنهن هڪ رياست طرفان ٻيءَ رياست کي تحفظ ڏيڻ جي صلاحيت جي پڌرائي ڪري ٿو. پر سفارتي حوالي سان ان جو استعمال اهڙي صورتحال ۾ ڪتب ايندو آهي، جڏهن ٻه رياستون پاڻ ۾ روايتي سفارتي لاڳاپا نه رکندي به، هڪٻئي سان واسطيداريءَ ۾ رهن. هن صورتحال ۾ ڪابه هڪ رياست ٻيءَ سان سڌا سنوان ناتا نه رکندي، ڪنهن ٽين رياست کي هن طرفان ڪاروهنوار هلائڻ جو اختيار ڏيندي، پنهنجن مفادن جو تحفظ ڪري ٿي. انهيءَ اختيار تحت ڪنهن به بند ڪيل سفارتخاني جي عمارت جي سار سنڀال، ميزبان ملڪ ۾ رهندڙ سندس شهرين سان رابطي، واپاري رابطن بابت معلومات ۽ معاشي مفادن جي تحفظ سميت ، ڪيترائي معاملا شامل ٿي سگهن ٿا. عام طور تي اهڙي صورتحال تڏهن جڙندي آهي، جڏهن علائقائي ٽڪراءُ سبب، ٻه رياستون سندن وچ ۾ قائم سفارتي لاڳا ختم ڪري ڇڏينديون آهن، پر ان جي باوجود پنهنجي وسيع تر مفادن سبب مڪمل لاتعلقي پسند نه ڪنديون آهن. اڄوڪي دور ۾ سويڊن طرفان اُتر ڪوريا ۾ آمريڪي مفادن جي، سئٽزرلئنڊ ۽ پاڪستان طرفان آمريڪا ۾ ايراني مفادن جي ۽ ڪئنيڊا طرفان ڪيوبا ۾ اسرائيلي مفادن جي سار سنڀال ڪئي پئي وڃي. ماضيءَ ۾ به بيشمار ملڪن اهڙيون ذميواريون ادا ڪيون آهن.