هي مشهور سياسي مُفڪرن ”رابرٽ ڪيهان“ ۽ ”جوزف ناءِ“ جو نظريو آهي، جنهن ۾ مُختلف سماجن ۽ رياستن جي هڪٻئي سان گهڻ - رُخن ڳُجهن ۽ پڌرن رابطن جو اڀياس ڪيو ويندو آهي. هنن دانشورن جو خيال هئو ته وقت گُّذرڻ سان گڏ قومن وچ ۾ عالمي سطح تي تعاون ۽ ويجهڙائيءَ جا رُجحان وڌندا. اهڙي تعاون جا بُنياد لبرل ۽ حقيقت پسند نظرين جي پاڻ ۾ ٿيل سنجوڳ مان ورتل آهن. هن نظريي جي حامين جو چوڻ آهي ته موجوده دور ۾ انسانذات جي وچ ۾ انتشار پيدا ڪندڙ حڪمت عملين ۽ دُنيا ۾ تڪرار وڌائيندڙ نظرين جي ڀيٽ ۾، سڄي عالمي برادريءَ کي هڪٻئي جي ويجهو آڻڻ ۽ دُنيا ۾ پائيدار امن قائم ڪرڻ جي ضرورت آهي. انهيءَ ڪري دُنيا جي ننڍن توڙن وڏن مُلڪن کي، هڪٻئي جي مسئلن توڙي حاصلات ۾ ڀاڱي ڀائيوار ٿي هڪ بهتر عالمي سماج جي اڏاوت ڪرڻي پوندي.