سرڪاري سطح تي ٿيندڙ سرگرمي ، جنهن ۾ هڪ رياست عمل، ردعمل ۽ باهمي عمل ڪري ٿي. ’پرڏيهي نيتيءَ‘ ذريعي ڪابه رياست پنهنجن ڪجهه خاص ترجيحن ، معيارن ، مقصدن ، فيصلن ۽ عملن جو ڳانڍاپو رياست کان ٻاهرين ڌرين يا بين الاقوامي سماج سان رکي ٿي . عام طرح بين الاقوامي ماحول تائين پهچ علائقائي حوالي سان ڪئي وڃي ٿي، ڇاڪاڻ ته بين الاقوامي ناتن جو تعلق علائقائي مفادن سان واڳيل ٿئي ٿو. ان کان سواءِ حڪومتي ڪاروهنوار ذريعي ٻين قومن جي رويي ۾ هاڪاري روين کي سگهارو ڪرڻ ۽ ٻاهرين سهائتا ذريعي قومي ترجيحن کي ڪاميابي به ان سرگرميءَ هيٺ ممڪن بڻبي آهي. پرڏيهي پاليسيءَ جا خاص مقصد هيٺيان آهن:
* ڪنهن به ملڪ جي وسيلن کي ملڪي سلامتي ۽ قومي مُفادن جي حصول لاءِ استعمال ڪرڻ ۽ ان حوالي سان بنيادي اصولن ۽ دائرن جي سرڪاري سطح تي جوڙجڪ ڪرڻ.
* دنيا جي ٻين قومن/رياستن/ادارن سان رابطا رکي گڏيل سهڪار وڌائڻ ۽ پرڏيهه ۾ رهندڙ شهرين جي حفاظت ڪرڻ.
*ملڪي معاشي مفادن جي حفاظت ۽ وڌاءَ لاءَ پتوڙڻ ۽ ان سلسلي ۾ معاهدن ذريعي مستقل حل ڳولڻ.رياستي اثر کي وڌائڻ ۽ بين الاقوامي برادريءَ ۾ بهتر مرتبو ماڻڻ. جيئن ته پرڏيهي نيتيءَ ذريعي ڪنهن به حڪومت ۽ رياست کي ٻين رياستن ، غير رياستي عنصرن ۽ ادارن سان لهه وچڙ ۾ اچڻو پوي ٿو، تنهنڪري اهي پاليسيون گهڻو ڪري لاڳاپيل سرڪارون اعليٰ سطحي ادارن ذريعي جوڙين ٿيون . خاص طور قانون ساز ادارا ، ڪابينا، حڪومت جو سربراهه ۽ پرڏيهي کاتي جو وزير سندس ماتحت ڪامورا پرڏيهي پاليسيءَ کي ترتيب ڏيڻ جي سلسلي ۾ بُنيادي ڪردار ادا ڪن ٿا. ڪنهن به ملڪ جي پرڏيهي پاليسيءَ جي سگهاري هئڻ جو دارومدار اُن جي اندروني سگهه جي ذريعن، مثال طور: سياسي توڙي معاشي نظام ، حاصل ٿيل ترقي، پکيڙ، وسيلن، علائقي، آبهوا ،ثقافتي ۽ تاريخي ورثي ، ٽيڪنالاجي ، فوجي طاقت ، قومي صلاحيت ، سماجي تاڃي پيٽي ، عوامي رويي ، ميڊيا جي ڪردار، سياسي احتساب ۽ قومي قيادت جي صلاحيتن تي ٻڌل هوندو آهي . جڏهن ته ٻاهرين سگهه ۾ عالمي طاقتي سرشتو ، بين الاقوامي تنظيمون ۽ قانون ، ٻين رياستن جو رويو ، ٻين ملڪن سان ٿيندڙ اتحاد ، عالمي غير سرڪاري ادارن سان رابطو ۽ عالمي عوامي راءِ وغيره تي ٻڌل هوندو آهي. هونئن ته پرڏيهي پاليسي قديم دور کان وٺي جڙندي رهي آهي ، پر خاص طرح هيءُ اصطلاح سترهين صديءَ کان وٺي عالمي سياست ۾ زور شور سان استعمال ٿي رهيو آهي . ويهين صدي عيسويءَ ۾ لڳل عالمي جنگن کان پوءِ هن سلسلي ۾ تمام گهڻيون اڳڀرائيون ٿيون