گڏيل قومن ۽ دولت مُشترڪه جي معيارن مطابق 10 لک کان گهٽ آبادي رکندڙ رياستن کي ’پتڪڙيون رياستون‘ چيو ويندو آهي. خاص طور دولت مُشترڪه سان لاڳاپيل جن 27 رياستن کي با ضابطا طور ننڍيون رياستون مڃيو وڃي ٿو، انهن جا نالا هيٺينءَ ريت آهن. قبرص، مالٽا،گيانا، باربادوس، بهاماز، بيلزي، اينٽيگُئا، باربُوڊا، سينٽ لُوسيا، گرينيڊا، سينٽ وِنسنيٽ، ڊومنيڪا، سينٽ ڪِٽس- نيوس، ماريشس، بوٽسوانا، گيمبيا،سوازيلئنڊ، سيشيلز، بُرونائي، مالديوز، فجي، سولومن آئيلنڊس، الهندي سَموئا، وانائاتُو، ٽُونگو، ڪريبٽي، تُوالو ۽ نارو . مجموعي طور تي سڄي دنيا ۾ تقريبن 40 ننڍيون رياستون آهن، جن مان ڪي جاگرافيائي لحاظ کان دُنيا جي اهم گهٽن ۽ گهيڙن تي قائم آهن. انهن منجهان ڪئريبين ،هندي ۽ پئسيفڪ جي ساحلن واريون رياستون دفاعي ۽ ٻاهرين مُداخلت جي حوالي سان هيڻائيءَ ۾ ورتل آهن . 1983ع ۾ آمريڪا طرفان گرينيڊا تي ٿيل فوجي چڙهائي ءَ کان پوءِ ته دنيا جي سوچندڙ حلقن ۾ اهوتاثر پيدا ٿيو، ته ننڍيون رياستون عالمي سياست ۾ مٿي جو سور هُئڻ سبب معاشي طور تي پاڻ ڀريون نه ٿيون رهي سگهن. گڏيل قومن جي مختلف ادارن ۾ کين مليل مساوي ووٽ جي حق بابت تمام گهڻا بحث مُبا حثا ٻُڌڻ ۾ اچن ٿا. خاص طور تي آمريڪا کي ننڍين قومن جي عالمي برادريءَ ۾ حيثيت بابت تمام گهڻا تحقظات آهن