عالمي سياسي نظام جي حوالي سان استعمال ٿيندڙ هڪ اصطلاح ، جنهن ذريعي دُنيا جي مک گهڻ- قومي ادارن (MNCs) ۽ صنعتي طور اُسريل مک قومن (AINs) وچ ۾ وسيع تعاون جو ماحول پيدا ڪيو ويندو آهي، ته جيئن معاشيات کي عالمي سرشتي ۾ مٿانهين سطح تي سگهاري قوت طور برقرار رکي سگهجي. ٻي عظيم جنگ جي خاتمي کانپوءِ قائم ٿيل ”پرڏيهي معاملن بابت ڪائونسل“ (Council for Foreign Relations) ۽ European Bilderbergers نالي ٻه اهڙيون غير سرڪاري تنظيمون قائم ٿيون، جن جو بنيادي مقصد ايٽلانٽڪ سمنڊ جي ٻنهي طرفن تي موجود ملڪن جي معاشي توڙي سياسي پاليسين تي اثر انداز ٿيڻ هو. انهن ملڪن وچ ۾ تجارتي جنگ جي خطري کي روڪڻ لاءِ، مشهور آمريڪي صنعتڪار ’ڊيوڊ راڪفيلر‘ (David Rockefellor) ۽ آمريڪي پرڏيهي معاملن جي ماهر ’زبگينوبرزنسڪي‘ (Zbigniew Bryzezinski) جي تصورن جي ميلاپ سان ٽه- رخي ڪميشن (Trialteral Commision) جو بنياد عمل ۾ آيو. جنهن جو بنيادي مقصد، دُنيا ۾ هڪ اهڙو معاشي نظام قائم ڪرڻ هو، جنهن سان بنا ڪنهن ويڙهه جي سمورين ڌرين ۽ قومن کي فائدو پهچي سگهي. تاريخي طور هر اثرائتي تنظيم جو هڪ منتظم هوندو آهي، اڄ جي عالمي نظام ۾ منتظم جو اهو ڪردار گڏيل طور تي آمريڪا، جاپان ۽ اولهه يورپ جي حڪمرانن کي چئي سگهجي ٿو. ويهين صديءَ ۾ قائم ڪيل ٽه- رُخي ڪميشن (Trilateral Commision) جو هر ميمبر، پنهنجي شعبي ۾ هڪ وڏي بااختيار عُهدي تي موجود هوندو آهي. انهن ميمبرن جي مرتبي کي ڏسندي، محسوس ڪري سگهجي ٿو، ته منجهانئن هر ميمبر پنهنجي شعبي ۾ تمام گهڻي مڃتا حاصل ڪئي هوندي. پر جڏهن اهي سڀ شخص Trilateralism جي جهنڊي هيٺيان گڏجن ٿا، ته انهن جا مقصد عالمي امن جي سلسلي ۾ تمام گهڻا ڳڻتيءَ جوڳا محسوس ٿين ٿا