جڏهن به ڪي ٻه يا ٻن کان وڌيڪ بين الاقوامي ادارا ٻن ملڪن جي تعلقات واري سرڪاري فهرست ۾ شامل نه هجن، پوءِ به متحرڪ ڪردار ادا ڪن، ته سندن سرگرمين کي ”سرڪاري سهڪار کان مٿانهين“ (Transgovernmental) لاڳاپن طور سڃاتو وڃي ٿو. هن طريقي موجب، پرڏيهي پاليسيءَ جي رُخَ ۾ ٻن ملڪن ۾ ٿيندڙ ڏي- وٺ، سرڪاري طور يا حڪومتي سطح تي ناهي هوندي، پر پاليسيءَ جا جوڙيندڙ ٻيا ادارا اُن لاڳاپي جي ترتيب، رياستي مُفادن ۽ ملڪن جي آئيني قاعدن جي ترجيحن مطابق رکن ٿا. بين الاقوامي لاڳاپن ۽ معاملن ۾ هن قسم جي حڪمت عمليءَ جي وڏي اهميت اها آهي، ته ان تحت ٿيندڙ سرگرمين ۾ ڪو به سرڪاري ادارو يا ملڪ سنئون سڌو نه ڪردار ادا نه ڪندو آهي ۽ نه ئي وري مڪمل طور ذميوار هوندو آهي. روايتي سرڪاري لوازمات ۾ نه ڦاسڻ ڪري ٻن ڌُرين وچ ۾ جيڪي به معاهدا ٿين ٿا، تن تي تمام جلد عمل ۽ تحرڪ ٿئي ٿو. ان جي ڀيٽ ۾ ٻن مُلڪن وچ ۾ ٿيندڙ واپاري سرگرمين جوعمل خودبخود ايترو ته تيز هوندو آهي، جو انهن ملڪن جي وچ ۾ سڌوسنئون رابطو تمام ضروري ٿي پوندو آهي، ڇاڪاڻ جو ائين ڪرڻ سان ٿيندڙ واپار کي سرڪاري سرپرستي ملي ويندي آهي، جنهنڪري ڪامورا شاهيءَ جا حربا نه هلي سگهندا آهن