1958ع ۾ قائم ڪيل هيءَ تنظيم علائقائي سطح تي ڪسٽم ڊيوٽي ۽ ٻين واپاري رڪاوٽن کي ختم ڪرڻ لاءِ جوڙي وئي، جڏهن ته ٻين ملڪن ۾ ٻاهريان ٽيرف لاڳو ڪري ٻيا لاڳاپيل اپاءُ وٺڻ به شامل ڪيا ويا، جنهن ۾ زراعتي پاليسيءَ ۽ سرمايي کي يورپ جي آزاد ملڪن جو تحفظ حاصل آهي. تنظيم جا بنيادي ميمبر بيلجيم، فرانس ، اولهه جرمني، ، اٽلي ، لڪسمبرگ ۽ هالينڊ هئا، جڏهن ته ڊينمارڪ، آئرلينڊ ۽ برطانيا 1973ع ۾ ميمبر ٿيا . يونان 1981ع ۾ اسپين ۽ پورچوگال 1986ع ۾ ميمبر ٿيا . يورپي برادري جو اصطلاح ٽن مختلف تنظيمن ڏانهن اشارو ڪري ٿو، جيڪي مختلف معاهدن تحت ڪم ڪن ٿيون . انهن ٽن تنظيمن يعني ’يورپين ڪول ۽ اسٽيل ڪميونٽي‘ ( 1952ع ) ، ’يورپين اٽامڪ انرجي ڪميونٽي‘ ( 1958ع ) ، يورپين اڪنامڪ ڪميونٽي (1958ع ) جي ٺهڻ بعد 1967ع کان يورپين يونين چئن عوامي پارلياماني ادارن ۾ خدمتون ڏئي رهي آهي، جن ۾ يورپين ڪميونٽي ڪميشن، يورپين ڪميونٽي ڪائونسل، يورپين پارليامينٽ ۽ ڪورٽ آف جسٽس آف يورپين ڪميونٽي شامل آهن .ان ڪري موجوده 12 ميمبرن ۾ EC جو استعمال يورپين اڪنامڪ ڪميونٽي وانگر عام بڻجي ويو. 1 نومبر 1993ع ۾ جڏهن ماسترخت معاهدو يورپي يونين جي حدن اندر عمل ۾ آيو ته EC جو اصطلاح يورپي برادري ۽ يورپي ملڪن لاءِ گڏيل طور استعمال ٿيڻ لڳو . معاهدي جي پهرين شِق جو پهريون حصو يورپي برادريءَ جي قيام جو حوالو ڏئي ٿو . انهيءَ معاهدي ”يورپي يونين“ جو اصطلاح پڻ متعارف ڪرايو .