”يورپي معاشي ۽ مالياتي يونين“ (EMU) جي ميمبرن ۾ آسٽريا، بيلجيم، قبرص، فنلئنڊ، فرانس، جرمني، يونان، آئرلنڊ، اٽلي، لڪسمبرگ،مالٽا، نيدرلئنڊس، پورچوگال، سلاويڪيا، سلونيا ۽ اسپين، شامل آهن. انهن ملڪن جنوري 1999ع ۾ ”يورو“ کي باهمي ڏيتي ليتيءَ لاءِ معياري سڪي طور منظور ڪيو ۽ بعد ۾ 01 جنوري 2002 کان ان کي سرڪاري سطح تي ڪار- وهنوار لاءِ گڏيل سڪي جي حيثيت ۾ چالو ڪيو. ان کان سواءِ يورپ جي ٻين ملڪن مانٽينگرو، اندورا، موناڪو، سئن مارينو ۽ ويٽڪن به ”يورپي يونين“ کان ٻاهر هوندي ”يورو“ کي سرڪاري ڪرنسيءَ جي حيثيت ڏني آهي. ”يورو“ ڊالر کان پوءِ دنيا جي ٻئي وڏي ”ناڻي جي ذخيري“ (Reserve Currency) طور استعمال ته ٿئي ٿو، پر ان جي نوٽن جو ڦهلاءُ، 2010ع ۾ آمريڪي ڊالر کي مات ڏيئي چڪو آهي. جن علائقن ۾ اهو سڪو سرڪاري طرح استعمال ٿئي ٿو، اهي علائقا ٻئي نمبر تي سگهارو معاشي خطو آهن. ”يورو“ جي نالي سان هن سڪي جا ڪاغذي نوٽ 16 ڊسمبر 1995ع تي منظور ڪيا ۽ هن وقت يورو دنيا جي مالياتي ۽ ڪاروباري وهنوار ۾ ڏينهون ڏينهن اڳتي آهي.