جنگي حوالي سان استعمال ٿيندڙ اصطلاح ، جنهن ذريعي ڪنهن به اهڙي خودمختيار رياست جي نشاندهي ڪئي وڃي ٿي ، جيڪا ٻن جنگ وڙهندڙ ڌُرين وچ ۾ هلندڙ تڪرار دوران مڪمل طور تي اڻ- ڌُري رهي ۽ ڪنهن جو به پاسو وٺڻ کان پري رهي . گڏيل قومن جي ’هيگ ڪنوينشن‘ (1907ع) جي 5 ۽ 13 شِق ۾ ’اڻ- ڌُريائيءَ‘ جي تصور بابت تفصيل سان وضاحتون ڪيل آهن. مڪمل طور اڻ- ڌُري رياست اُها هوندي آهي ، جيڪا بين الاقوامي معاهدي ذريعي هلندڙ دور ۽ آئيندي ۾ ٿيندڙ سڀني جنگين دوران مڪمل طور پاسيري رهي ۽ ڪنهن به جهيڙيندڙ ڌُر جي سنئين سڌي يا اڻ- سڌي طرح ڀَرِ وٺڻ کان پرهيز ڪري . اهڙي رياست ڪنهن به فوجي اتحاد يا جنگي مهم جو حصو نه هوندي آهي . دنيا ۾ ان قسم جو هڪ مثال جاپان آهي ، جنهن ٻي عالمي جنگ کان پوءِ پاڻ کي هرطرح جي اڳرائيءَ ڀريل فوجي سرگرميءَ کان پري رکيو آهي . اڪثر ڪري ڪنهن به اڻ- ڌُري رياست طرفان اڻ- ڌُريي رويي جو اظهار ان ڌُر جي اختيار ڪيل پرڏيهي پاليسيءَ ذريعي ٿيندو آهي .