جيڪي رياستون جنگي ۽ ويڙهاڪ ذهنيت ذريعي ٻين رياستن سان لهه وچڙ ۾ اينديون آهن، تن لاءِ هيءُ اصطلاح استعمال ڪيو ويندو آهي. هيءُ بنيادي طور ”باسق“ (Basque) ٻوليءَ جو لفظ آهي ۽ سندس عظيم ديوتا جي نالي طور استعمال ڪيو ويندو آهي. انهيءَ لفظ جو استعمال انگلنڊ جي بادشاهه ايڊورڊ پهرئين طرفان ويلز مٿان ٿيل ڪاهن جي دوران، ڪرايي تي ڀرتي ٿيل سندس سپاهين واتان ٻڌو ويو هو. 1878ع ۾ اهو لفظ مشهور انگريزي ڳائڻي G.W Hunt پنهنجي مشهور گيت We don’t want fight, yet by jingo. ۾ پڻ تڏهن استعمال ڪيو، جڏهن ساڳئي سال روس ترڪيءَ جي علائقن تي قبضو ڪرڻ شروع ڪيو هو. هن گيت جو مقصد انگلينڊ جي فوج ۽ عوام ۾ اتساهه پيدا ڪري روسي اڳرائيءَ کي روڪڻ هُئو. اڄوڪي دؤر ۾ ”جِنگو اِزم“ مان انتهاپسنديءَ تي ٻڌل قوم پرستي يا شدت پسندي ۽ پرستاريت جو مقصد ورتو وڃي ٿو. ڪڏهن ڪڏهن سياسي اڪيلائپ (Isolationism) کي به هن تصور سان سلهاڙيو وڃي ٿو. آمريڪي صدر ’جان ايف ڪينيڊي‘ ڪنهن دور ۾ آمريڪي پرڏيهي پاليسيءَ ۾ موجود هن لاڙي جي سخت مخالفت ڪئي هُئي