1979ع ۾ لاطيني آمريڪا جي مُلڪ نڪاراگُئا ۾ هٿياربند جدوجهد ذريعي آمريڪا مخالفت سوشلسٽ انقلاب آيو. هن ويڙهه ۾ نڪاراگئا جي انقلابين 50 سالن کان حڪمراني ڪندڙ ’سوموزا خاندان‘ کي جولاءِ 1979ع ۾ مُلڪ مان ڀڄي وڃڻ تي مجبور ڪيو، ’سوموزاخاندان‘ جي فوجن ۽ عوامي حمايت يافته ويڙهاڪن جي وچ ۾ ٿيندڙ انهيءَ لڙائيءَ ۾ لڳ ڀڳ 50،000 ماڻهو مارجي ويا ۽ تقريباً ملڪ جي 20 سيڪڙو آبادي بي گهر ٿي. سوموزا کان پوءِ ’ڊئنيئل اورتيگا‘ جڏهن نڪاراگوا جو صدر ٿيو ته، کاٻي ڌر سان تعلق رکڻ ڪري، آمريڪا ان جي شديد مخالفت ڪندي، سندس مُخالف ’ڪونٽرا باغين‘ جي مدد ذريعي انقلاب کي ناڪام بڻائڻ جي ڪوشش ڪئي. آمريڪي صدر ’رونالڊ ريگن‘ جي حڪومت ۽ سندس مُشيرن ننهن چوٽيءَ جو زور لائي، اورتيگا حُڪومت کي ناڪام ڪرڻ جي ڪوشش ڪئي، پر کين ڪجهه به هڙ حاصل نه ٿيو. بعد ۾ اورتيگا جي حُڪومت جو خاتمو عام چونڊن ۾ سندس مُخالف صدارتي خاتون اميدوار ’چامارو‘ جي سوڀ ذريعي مُمڪن ٿيو.