Racialism

متڀيد تي ٻڌل نظريو، جنهن ۾ نسل ، رنگ، قوم، حسب نسب ۽ ماضيءَ جي مرتبي کي بنياد بڻائي معاشي، سياسي، ثقافتي ۽ شهري پاليسيون جوڙي ، ڀُوري چمڙيءَ ۽ يورپي نسل جي ماڻهن جي برتريءَ کي يقيني بڻايو ويو. ان قسم جو رياستي رويو خاص طور آفريقا ۽ ايشيا ۾ نظر آيو،جتي ڪاري ۽ رنگدار چمڙيءَ جي آباديءَ کي غلام بڻائي، سندن بنيادي حق ڦٻائي، کين وڏي عرصي تائين جائزسياسي ۽ معاشي حقن کان وانجهو رکيو ويو. هونئن ته اها پاليسي قديم دور کان مختلف روُپن ۾ موجود رهي آهي، پر جديد دور(1882-1816) ۾ فرانسي ليکڪ ، سفارتڪار ۽ ’گوبينو‘ ڪائونٽي جي نواب ’جوزف آرٿر‘ پنهنجي مشهور ڪتاب An Essay on the Inequality of the Human Races (1853–1855) ۾ آريائي نسل جي ماڻهن کي حڪومتي وهنوار لاءِ بهتر سمجهندي ’نسلي برتريءَ‘ جي بنياد تي اقتدار هٿ ڪرڻ لاءِ زور ڏنو. سندس چوڻ هو ته ” ڌرتيءَ جي گولي تي موجود ڪارا ماڻهو اُتساهه ڀريا ، راڳ جا شوقين ۽ فَن ڏانهن لڙيل آهن، ڦِڪي چمڙيءَ وارا لوڪ ڌنڌي واپار، تنظيم ڪاري ۽ خدمت چاڪريءَ ۾ ڀڙُ آهن، جڏهن ته ڀوُري چمڙيءَ وارا انسان عقل ۽ وقار ۾ اڳڀرا آهن، تنهنڪري دنيا جي سرداري کين سُونهي ٿي.“ هن نظريي جرمنيءَ ۽ آمريڪا ۾ وڏي مڃتا ماڻي ۽ سندن ثقافت، لوڪ ادب ،۽ نصاب جو حصو بڻجي اداراتي شڪل اختيار ڪري ويو. ان کان علاوهه بيٺڪي راڄ ۾ هن تصور کي وڏي هٿي ملي ۽ ڏکڻ آفريقا سميت دنيا جي ڪيترن علائقن ۾ قابض قوتن نسلي متڀيد جي بنياد تي رياستي ۽ حڪومتي وهنوار هلايو. Racism (نسلي وڏائي) جو اصطلاح به هن تصور جو هڪ تسلسل آهي، جنهن جي ’گڏيل قومن جي شهري حقن واري ڪميشن‘هيٺينءَ طرح تشريح ڪئي آهي. ”نسلي وڏائي هڪ روش، عمل يا اداراتي جوڙجڪ آهي ، جيڪا ڪنهن ٻئي شخص کي هيٺان ڪرڻ لاءِ خاص قسم جي نسل طرفان اختيار ڪئي وڃي ٿي.“ اهڙي وڏائيءَ جي نتيجي ۾ چمڙيءَ جي بنياد تي هڪ نسلي ايڪو ٻئي ايڪي سان ساڙ ۽ دُشمني رکي ٿو