1990ع ۾ ڪوويت ۽ عراق جي وچ ۾ عراقي تيل جي ڪوويتي علائقي ۾ ”کوٽائي ذريعي ٿيندڙ چوري“ ڪرڻ واري معاملي ۽ سرحد تي فوجي ٺڪاڻا ٺاهڻ تي اڻبڻت شروع ٿي. عراق طرفان ڪوويت تي الزام هنيو ويو ته ڪوويت سندس 2.4 بلين ڊالر جي ماليت جو پئٽرول چوري ڪيو آهي ۽ ان سان گڏ عراق طرفان ڪوويت تي تيل جي قيمتن ۾ عدم استحڪام جو به آروپ (الزام) لاڳو ڪيو ويو. اهي بهانا گهڙي ۽ بين الاقوامي قانون جي ڀڃڪڙي ڪندي، عراق 2 آگسٽ 1990ع تي ڪوويت تي قبضو ڪيو. گڏيل قومن جي اداري سلامتي ڪائونسل عراق جي انهيءَ اڳرائيءَ جو نوٽيس وٺندي، 6 - آگسٽ 1990ع تي عراق مٿان اقتصادي پابنديون لاڳو ڪيون، پر عراق پوءِ به ڪوويت کي خالي نه ڪيو. آخرڪار 29 نومبر 1990ع تي سلامتي ڪائونسل 16 جنوري 1991ع کان اڳ عراق کي ڪوويت خالي نه ڪرڻ جي صورت ۾، گڏيل قومن جي سهڪار سان طاقت جي استعمال جو چتاءُ ڏنو پر عراق ان چتاءَ کي به رد ڪري ڇڏيو. نيٺ 17 جنوري 1991ع تي آمريڪا، برطانيه ۽ فرانس جي فوجي سربراهيءَ ۾ دنيا جي 30 ملڪن عراق تي حملي جي شروعات ڪئي. جنهن جي نتيجي ۾ عراق کي زبردست شڪست ملي ۽ آخرڪار 26 فيبروري 1991ع ۾ عراق ڪوويت مان پنهنجون فوجون ڪڍيون. 28 فيبروري 1991ع تي صدر جارج بُش سينيئر جي حڪمن تحت هن جنگ جي پُڄاڻي ٿي