اصل ڄمڻ واري ملڪ کان ٻاهر ٻئي ملڪ ۾ رهندي،شهريت/قوميت جو درجو ملڻ جو عمل ، جنهن ۾ قانوني گهرجون پوريون ٿيڻ کان پوءِ لاڳاپيل شخص کي نئين ملڪ جي شهريءَ طور مڃتا ملندي آهي. ان سلسلي ۾ هر ملڪ جا قانون جدا جدا هوندا آهن، پر عام طرح طئي ٿيل مدي دوران ڪل-وقتي رهائشيءَ طور گذارڻ،ميزبان ملڪ جي قانونن جي پوئواري ڪرڻ ۽ ڪن صورتن ۾ پيدائشي ملڪ جي شهريت تان هٿ کڻڻ جي صورت ۾ نئين ملڪ جي شهريت ملندي آهي. شهريت ملڻ جو هي عمل انفرادي طور تي ڪنهن به موروثي رياست طرفان شهريءَ جون بنيادي آزاديون کسڻ، رياستي اختيارين پاران جان جو تحفظ نه ڏيڻ، مذهبي يا نظرياتي تفاوتن سبب اصل ملڪ ڇڏڻ يا فطري آفتن/انساني المين جي ڪري دربدريءَ جي ڪري شروع ٿئي ٿو. پر بهتر معاشي مرتبو ماڻڻ، ميزبان رياست جي ضرورتن يا فني ۽ ٻين ڪارڻن جي ڪري به نئين شهريت ملي سگهي ٿي. دنيا ۾ جنگين ۽ انقلابن جي ڪري انساني آبادي وڏي پيماني تي هڪ هنڌ کان ٻئي هنڌ تي لڏي ٿي، جنهن ڪري کيس ’اجتمائي نئين شهريت‘ ملي ٿي. 1922ع ۾ لڏي آيل آرمينيائي باشندن کي يونان جي حڪومت اها سهولت ڏني. رت جي رشتي ۽ ڌرتيءَ سان ناتي ذريعي عام طرح ملندڙ شهريت جي ڀيٽ ۾ هي طريقو هٿرادو ۽ قانوني تقاضائين جي پورائي کان پوءِ مهيا ٿي سگهندو آهي.