هيءَ هڪ علاقائي تنظيم آهي، جيڪا ارجنٽائين، برازيل، پيراگوائي ۽ يوروگوائي جهڙن آمريڪي ملڪن جي معاشي بهتريءَ لاءِ 1991ع ۾ ”آسنٽئان جي معاهدي“ تحت وجود ۾ آئي، هي تنظيم اُتر آمريڪا جي آزاد واپار واري تنظيم (NAFTA) کان پوءِ، آمريڪي کنڊ جي ٻيو نمبر، جڏهن ته دنيا جي چوٿين نمبر تي وڏو واپاري اتحاد آهي. هن اداري جي قيام کي فائديمند سمجهندي 1985ع ۾ ارجنٽائين ۽ برازيل هڪ ٻئي سان ”اِگئازو“ پڌرنامي جي اصولن مطابق ٺاهه ڪيو. ان تنظيم جي قيام کان اڳ ارجنٽائين ۽ برازيل سرحدي تڪرارن ۽ ٻين علائقائي معاملن جي ڪري روايتي دشمن طور سڃاتا ويندا هئا. پر برازيل ۽ ارجنٽائين ٻي عالمي جنگ کانپوءِ، جڏهن يورپ ۾ ٺاهه ۽ سهڪار جو ماحول (خاص طور ٻن وڏن يورپي روايتي دشمنن وچ ۾ ٺاهه واريءَ صورتحال) ڏٺو، ته انهن مُلڪن طرفان ڏکڻ آمريڪا ۾ به تجارتي سهڪار جي تمام گهڻي ضرورت محسوس ڪئي وئي. انهيءَ پس منظر سبب، نه رڳو ان دور ۾ پرا ڄ به ”مرڪوسر“ جي قاعدن ۽ ضابطن جي نظام کي بهتر کان بهتر بنائڻ جون ڪوششون ڪيون پيون وڃن. انهيءَ هاڪاري سهڪار جي نتيجي ۾، علائقي جي وڌيڪ ملڪن طرفان هن تنظيم ۾ شموليت جا امڪان ڏينهون ڏينهن چٽا ٿي رهيا آهن. جديد دور جي واپاري معاملن کي نظر ۾ رکندي، ”مرڪوسر“ جي قيادت ڪسٽم جي وصولين تي رعايتن، هر قسم جي وکرن تي مناسب اگهه جي مقرريءَ ۽ پوئتي پيل ميمبر ملڪن جي معاشي بهتريءَ لاءِ به نوان ۽ آسان طريقا ۽ قاعدا ترتيب ڏيئي رهي آهي