عام طرح ”ٽريٽي آف يورپيئن يونين“ جي نالي سان مشهور هي معاهدو، 7 فيبروري 1962ع تي نيدرلئنڊس جي شهر ماسترت ۾ ”يورپي برادريءَ“ (EU) جي ميمبر ملڪن وچ ۾ طئي ٿيو. ساڳئي شهر ۾ 9-10 ڊسمبر 1991ع تي ”يورپي ڪائونسل (EC) جي اجلاس ۾ هن معاهدي جو متن طئه ڪيو ويو ۽ 1 نومبر 1993ع تي اهو عمل ۾ آيو. هن معاهدي جي نتيجي ۾ ”يورپي برادريءَ“ جو قيام ممڪن ٿيو، ”يورو“ جي سڪي کي خطي جي واحد ڪرنسيءَ طور تسليمي ملي ۽ يورپي ملڪن ۾ معاشي، مالياتي ۽ سياسي ڳانڍاپي جو هڪ نئون دور شروع ٿيو. ماسترخ معاهدي تحت ميمبر ملڪن جي شهرين کي يورپ جي ڪنهن به ملڪ ۾ لڏي ويهڻ، اتي رهندي ووٽ جو حق استعمال ڪرڻ ۽ روزگار جي فراهميءَ سميت تمام گهڻيون سهولتون فراهم ڪيون ويون. پر بنيادي طور ان معاهدي کي ٽن اهم ٿنڀن ذريعي مضبوط بڻايو ويو، (1) يورپي ڀائيچارو (2) گڏيل پرڏيهي ۽ فوجي پاليسون (CFSP) ۽ (3) فوجداري معاملن ۾ پوليس ۽ عدالتي سطح تي سهڪار (JHA). انهن بنيادن جي نتيجي ۾ هيٺين حاصلات ممڪن ٿي :
-     ادارن جي جمهوري وجود کي سگهارو بنائڻ.
-     ادارن جي سرگرمين کي اثرائتو بنائڻ.
-     مالياتي ۽ معاشي سهڪار وڌائڻ.
-     سماجي معاملن تي گڏيل قانون سازي ڪرڻ.
-     سموري يورپ کي رابطائي حوالن سان ڳنڍڻ .
-     صنعتي ويجهڙائي ٿيڻ .
-     تعليمي ۽ هنري سکيا جو گڏيل سرشتو قائم ڪرڻ.
-     نوجوانن ۽ ثقافت جي معاملن کي مٿيرائي ملڻ .
-    انساني وسيلن جي ترقي ممڪن ٿيڻ. وغيره.
ماسترخ معاهدي جي ابتدا ۾ ان معاهدي جي جرمني، فرانس ۽ انگلينڊ ۾ سخت مخالف ٿي، پر آهستي آهستي ان کي وسيع عوامي مڃتا ملڻ شروع ٿي ۽ يورپ ۾ تڪرارن جي خاتمي ۽ سهڪار جي شروعات جو هڪ عظيم دور ڏسڻ ۾ آيو