هيءُ ويچار جنگي علمن جي ماهر ۽ مستقبل پسند دانشور هرمن ڪان (Hermann Kahn) پنهنجي جڳ مشهور ڪتاب “On Thermonuclear War“ ۾ 1960ع ڌاري ڏنو هو. ڪنهن به ائٽمي طاقت (خاص طور سوويت يونين) جي حملن کي مُنهن ڏيڻ لاءِ هُن ٽه- نُڪاتي روڪ (Deterrence) جو نظريو ڏنو. انهن مان پهرئين نُڪتي موجب سوويت يونين کي مثالي جواب ڏيڻ لاءِ سندس سرزمين تي سڌي ائٽمي حملي ذريعي حساب ڪتاب برابر ڪرڻو هُو. ان حڪمت عمليءَ تحت، آمريڪا ۾ لڳايل حساس اوزارن طرفان آمريڪي سرزمين تي ٿيل ائٽمي حملي جو اطلاع ملڻ شرط، آمريڪا جا نيوڪليائي هٿيار خودبخود وڃي سوويت يونين مٿان ڪڙڪن ها ۽ موجود انساني زندگيءَ سميت سموري حياتياتي سرشتي کي ناس ڪري ڇڏين ها. ”ڪاهان“ موجب، ان طرح جي ”مڪمل تباهيءَ ٿيڻ“ جي اڳواٽ آگاهي هُجڻ ڪري، ڪو به فيصلو ڪندڙ معقول شخص، ڪڏهن به مُخالف مُلڪ تي ائٽمي حملي جو تصور نه ڪري سگهندو. ان ”تباهه ڪن جوابي ائٽمي حملي جي شڪتيءَ“ کي ”قيامت آڻيندڙ مشين“ جي تصور سان سُڃاتو وڃي ٿو