قومپرست ۽ سوشلسٽ بُنيادن تي ٻڌل هيءُ هڪ انتهاپسند نظريو آهي، جنهن ويهين صديءَ جي پهرئين اڌ ۾ نازي جرمنيءَ ۾ عروج ماڻيو. هيءُ نظريو جرمن نازي تصورن مان پيدا ٿيل ۽ اساسي سماج- وادي نظريي کان بلڪل مُختلف هو، جنهن طبقاتي ڪشمڪش (Class Struggle) واري خيال کي رد ڪندي قومپرستي، سرمايه داري، سامراجيت ۽ نسل پرستيءَ تي ٻڌل خيالن هيٺ، عالمي نظام ۾ جرمنيءَ کي ٻين طاقتن سان همسري ڪرڻ لاءِ اُتساهيو. جرمنيءَ جو آمر ’ايڊالف هٽلر‘ هن نظريي جو باني ويندو آهي . جنهن پهرين عالمي جنگ کانپوءِ ٿيل ”ورسيلز معاهدي“ کي ختم ڪرڻ ۽ جرمنيءَ کي ٻيهر عظيم الشان سلطنت بڻائڻ واري خيال کي هٿي وٺرائي. هن نظريي جي ابتدا جرمني جي پورهيت جماعت ”جرمن ورڪرز پارٽيءَ“ سان ٿي، جيڪا مُختلف تبديلين منجهان گُذري ”نيشنل سوشلسٽ پارٽي“ (نازي پارٽي) جي روپ ۾ جرمن اقتدار تي قابض ٿي. اقتدار ۾ اچڻ کانپوءِ 1933ع ۾ هن نظريي جرمن قوم کي آريائي نسل سان لاڳاپيندي، کين دُنيا تي حُڪومت ڪرڻ جو حقدار ۽ ٻين قومن کي سندن تابع رهڻ واري خيال جي وڪالت ڪئي. هيءُ نظريو رنگدار ۽ ڪاري نسل جي قومن کي حقير ڄاڻائيندي، خاص طور يهودين کان سخت نفرت جو درس ڏيندو هو. 1945ع ۾ هٽلر جي اقتدار جي خاتمي کانپوءِ، هن نظريي جو زور مُڪمل طور ٽٽي ويو. هونئن”قومي سماج واد“ وارو اصطلاح پهريون ڀيرو فرانسيسي دانشور Matric Barres استعمال ڪيو، جنهن ۾ انفراديت پسندي، ڪثرت پسندي، ماديت ۽ ڀون- واد کي ملايو ويو هو. هن نظريي جو بُنيادي مقصد سرمايه دار معيشيت جي بُنيادن تي، هڪ پارٽيءَ جي بالادستيءَ سان ترجيحي رياستي ڍانچو جوڙڻ هو.