هي اصطلاح عام طور ساحل کان پرڀرو قائم ڪيل ڪنهن اهڙي تعميرات يا ٿيندڙ سرگرميءَ جي حوالي سان استعمال ٿيندو آهي، جيڪا ڪنهن پيداواري عمل جي حوالي سان هوندي آهي، ان سلسلي ۾ تيل جي کوٽائيءَ لاءِ، فولاد يا ڪنڪريٽ جا ٺهيل ٿلها (Platforms) يا ماهيگيريءَ لاءِ ٿيندڙ سرگرميءَ جو حوالو ڏنو ويندو آهي. پر اڄوڪي دور ۾ Offshoring جو اصطلاح ڪنهن به مشهور صنعتي/ خدمتي اداري طرفان پنهنجون سرگرميون امير ملڪن مان منتقل ڪري، غريب ملڪن ۾ قائم ڪرڻ واري عمل سان سُڃاتو وڃي ٿو. ان عمل سان سَستي پورهيي،گهٽ اُجوري تي زمين جي فراهمي ۽ ٻين سهولتن جي حاصلات ٿئي ٿي، جنهن ڪري وڏين ڪمپنين جي عمل در آمدي لاڳت (Operational Cost) ۾ وڏي بچت ٿئي ٿي.اڄڪلهه دنيا ۾ اها سرگرمي عام ٿي وئي آهي ، ڇاڪاڻ جو آمريڪا ۽ اولهه ۾ قائم ٿيل وڏن صنعتي ادارن مُلڪي قانوني سختين ۽ ڪاروباري لاڳت ۾ بچت وارن عنصرن نظر ۾ رکندي، پنهنجي پيداواري عمل کي ٽين دنيا جي مُلڪن، ڀارت يا ڏور اوڀر جي ملڪن منجهان جاري رکڻ ۾ بهتري سمجهي آهي.