عالمگيريت يا ڀونءِ واد جي ابتڙ استعمال ٿيندڙ هيءُ اصطلاح، دنيا جي مختلف رياستن يا عنصرن جي هڪٻئي سان واسطيداريءَ يا سهائتا ۾ ايندڙ ڪميءَ جي نشاندهي ڪري ٿو. جيئن ته ”عالمگيريت“ جو عمل معيشيت، واپار، ٽيڪنالاجي، سياست، ثقافت ۽ سماجيات سميت مختلف رخن ۾ ٿيندڙ بين الاقوامي سهڪار کي سگهارو ڪري ٿو، ان جي ابتڙ ”عدم عالمگيريت“ گهڻي قدر ”بين الاقوامي معيشيت“ جي ميدان ۾ ٿيندڙ عدم تعاون تائين محدود آهي. ان سلسلي ۾ 1850ع کان 1914ع ۽ 1950ع کان 2007ع وارن مدن کي نشانبر ڪري ٻڌايو وڃي ٿو ته انهن مدن دوران، ”ڀونءِ واد“ عالمي صورتحال ۾ هڪ عام ۽ اهم متي جي صورت ته اختيار ڪري ورتي، پر انهن مدن دوران به جڏهن جڏهن قومن وچ ۾ واسطيداري جهڪي ٿي ته ”عدم عالمگيريت“ واضح ٿي بيٺي. عام طرح هن اصطلاح کي، عالمي واپار دوران وکرن ۽ خدمتن يا درآمد ۽ بر آمد کي مجموعي قومي آمدنيءَ سان ڀيٽيندي، حاصل ٿيل نقصانڪار انگن اکرن ذريعي، يا پورهيتن جي ٻين ملڪن ڏانهن ٿيندڙ هجرت جي انگ، يا قومي آمدنيءَ جي تناظر ۾ ملڪ يا ان کان ٻاهر ٿيندڙ سڌي سنئين سيڙپڪاڙيءَ ۽ سراسري محصولن وغيره جي منفي ڪاٿي ذريعي جانچيو ويندو آهي. اڪثر ماهرن ”عدم عالمگيريت“ جي عمل کي منفي ڄاڻائيندي ٻڌايو آهي، ته ان سان عالمي ويجهڙائين ۽ واسطيدارين ۾ گهٽتائي اچي ٿي، معيشيت ۾ بحران جنم وٺن ٿا، بين الاقوامي تڪرارن ۾ اضافو ٿئي ٿو، ۽ بين الاقوامي واپار ۾ تمام گهڻي گهٽتائي ظاهر ٿئي ٿي