1971ع ۾ انساني ڀلائيءَ لاءِ جاکوڙيندڙ مشهور تنظيم ”انٽرنيشنل ريڊ ڪراس“ (IRC) جي طرفان ”ميڊيسنس سان فرنٽتيري“ (MSF) جي فرينچ نالي ۾ هڪ نئين ٺهيل شعبي کي متعارف ڪرايو، جيڪو وقت سان گڏ اُسرندو ويو. هن وقت ”ايم ايس ايف“ دُنيا ۾ عام ڀلائيءَ جو تمام وڏو ادارو آهي، جنهن جو بُنيادي ڪم بيمارين کان مُتاثر ماڻهن جو مفت ۽ سهولتن ڀريو علاج ڪرڻ آهي. يورپ جي ڇهن ۽ دُنيا جي ٻين ٻارنهن مختلف ملڪن ۾ ”ايم ايس ايف“ ڪم ڪري رهي آهي.ڪنهن ملڪ ۾ سياسي يا جنگي حوالي سان حالتون خراب ٿيڻ جي ڪري پيدا ٿيل هنگامي ۽ انساني الميي جوڳي صورتحال ۾، هيءَ تنظيم پنهنجي- مُنهن يا سماجي ڀلائيءَ جي ٻين بين الاقوامي، علائقائي يا مقامي ادارن سان گڏجي بحاليءَ جو ڪم ڪندي آهي. ”ايم ايس ايف“ سان لاڳاپيل ماهر يا خاص عملو، جهڙوڪ ڊاڪٽر، نرسون، سرجن ۽ ٻيا آفيسر، ڪنهن به نسلي يا لساني متڀيد کان آزاد ٿي ڪم ڪن ٿا. ايمرجنسيءَ واري صورتحال ۾، ڪم ڪرڻ سان گڏوگڏ هيءَ تنظيم صفائيءَ ۽ صحت جي هر معاملي ۾ پنهنجو ڪردار ادا ڪري ٿي. ”ايم ايس ايف“ پاران ڪيترائي رضاڪار آفريقي کنڊ جي مختلف ملڪن جي عوام ۽ ٻي آبادي کي صحت جي بنيادي مقصدن بابت تعليم ۽ آگاهي ڏيندا آهن. هيءَ تنظيم اڄوڪي دور ۾ به، دُنيا جي مختلف مُلڪن ۾ تعليم ۽ صحت جهڙين بنيادي سهولتن کي مفت مُهيا ڪرڻ ۽ ان حوالي سان گهربل سهولتون فراهم ڪرڻ جي هر ممڪن ڪوشش وٺي رهي آهي