ڪنهن به رياست جي اٿاهه سگهه، جنهن ذريعي اُها ٻين طاقتن ۽ رياستن جي رويي کي پنهنجيءَ مرضي مطابق تبديل ڪري سگهي. اهڙي طاقت بين الاقوامي تعلقات ۾ پنهنجي سياسي، معاشي ۽ فني برتريءَ سبب ان پوزيشن ۾ هوندي آهي، ته ٻين ڌُرين جي مٿان اثر انداز ٿي، سندن فيصلا تبديل ڪرائي سگهي ۽ کانئن پنهنجي مرضيءَ مطابق پاليسيون جوڙائي سگهي. اها طاقت عالمي نظام ۾ به پنهنجين نظرين کي مڙهيندي عالمي سياسي سرشتي کي ڪنٽرول ڪندي آهي. آمريڪا طرفان ”ٿڌي جنگ“واري دور ۾ طاقت ور ڪردار ادا ڪرڻ سبب، اولهه يورپ جا مُلڪ عالمي سياست ۾ سندس اڳواڻي مڃڻ تي مجبور ٿيا ۽ سندس دٻاءَ موجب پاليسيون ترتيب ڏيڻ لڳا. ساڳي برتري اوڀر يورپ ۾ موجود ڪميونسٽ ۽ ٻين مُلڪن مٿان سوويت يونين کي مليل هُئي. هن سگهه جي ذريعي هڪ طاقتور ڌُر طرفان ٻين ڌُرين کي مالي/ اقتصادي امداد، فوجي سگهه ۽ ٽيڪنالاجيءَ جي فراهميءَ سبب کين پنهنجو ڳيجهو بڻايو ويندو آهي