سَلامَتِي ڪائُونسِلِ: ]ا - خاص[ اَقوامِ مُتَحِده جو هِڪُ اَهَم ذيلِي اِدارو (جيڪو دُنيا جي سَڀنِي مُلڪَنِ ۾ اَمنَ ۽ سَلامَتِيءَ توڙي ڪَنهِن مُلڪَ جِي حَدُنِ ۾ ڪَنهِن بيرونِي حَملي وَغيرَه ۽ اُنَ جي بَچاءَ مُتَعلِق مُعامِلَنِ تي غورُ ڪَندو آهي)

Security council

دُنيا ۾ امن جي بحاليءَ ۽ اجتماعي تحفظ لاءِ قائم ڪيل گڏيل قومن جي هن اهم جُز جا 15 رڪن، 5 مستقل ۽ ڏهه غير مستقل آهن. غير مستقل رڪنن جي چونڊ جنرل اسيمبلي ٻن سالن جي عرصي لاءِ ڪندي آهي، جڏهن ته آمريڪا، روس، برطانيا، فرانس ۽ چين ان جا مستقل رڪن آهن. هن اداري جو ڪم دُنيا کي ملندڙ بُحرانن، جنگين ۽ ٻن مُلڪن/ اتحادن ۾ ٿيندڙ تنازعن تي ڪنٽرول ڪرڻ ”گڏيل قومن جي پڌرنامي“ موجب دُنيا جي تڪراري خطن ۾ امن فوج مقرر ڪرڻ، عالمي قانونن جي ڀڃڪڙي ڪندڙ قومن مٿان پابنديون مڙهڻ، اڳرائي ڪندڙ رياستن مٿان فوجي قلم کڻڻ ۽ ٻين امڪاني بُحرانن جو رستو روڪڻ آهي. اداري جي ڪنهن به مستقل ميمبر کي ڪنهن به قرارداد يا فيصلي کي رد ڪرڻ جو خاص اختيار (Veto Power) مليل آهي. هن اداري جي مستقل ميمبر کي هر وقت سلامتي ڪائونسل جي گڏيل قومن جي مرڪز نيويارڪ ۾ رهڻو آهي، ته جيئن ڪنهن به امڪاني يا هنگامي معاملي / صورتحال تي سڀ ميمبر فوري مشاورت ڪري سگهن، هن اداري جو پهريون اجلاس 17 جنوري 1946ع تي چرچ هائوس لنڊن ۾ منعقد ٿيو